SYUKUR diti kapanahak koundaran kumaa 100,000 mamaramit id pototongkod pogun – Haji Hajiji Haji Noor
KOTA KINABALU: Boyoon Montiri (KM), Datuk Seri Haji Hajiji Haji Noor popoimpuun Ababayan Sentuhan Kasih Rakyat 2025 (SYUKUR) do jaam ko 10 kosuabon baino’ (19tw Koduo) id Longkod Koubasanan Rumpun BajauSama Sabah, Tuaran.
SYUKUR diti pikikiro kapanahak koundaran kumaa 100,000 mamaramit id pototongkod pogun.
Ababayan diti koposodia’ ponguhupan tunui soginumu’ RM300 tikid wulan kumaa mamaramit di kosudong gisom ko 31tw Kohopod om Duo 2025.
Mamaramit montok ababayan diti kopohompit Luguan Suang Walai (KIR) mosikin om mosikin ‘tegar’ i poinrojistor id sistem e-Kasih gisom di ko 31tw Kohopod om duo 2024.
Ginumu’ pambayaran montok ababayan diti bayaran tumanud fasa miampai tikid fasa nopo nga’ bayaran maya’ ‘lump-sum’ montok timpu tolu wulan ilo’ nopo nga’ soginumu’ RM900 i posuangon kumaa akaun diolo’ i kiharo akaun om kumaa mamaramit ponguhupan miampai tunui.
Fasa iso’ do wulan Koiso’-Kotolu 2025, poikidon mimpuun wulan Koduo naamot fasa koduo (Kaapat-Koonom 2025), poikidon mimpuun wulan Kaapat; fasa kotolu (Koturu’-Kosiam 2025) poikidon mimpuun wulan Kosiam 2025 om fasa kaapat (Kohopod-Kohopod om Duo 2025) poikidon do wulan Kohopod 2025.
Wookon sondikoton SYUKUR nopo nga’ monginggaan tonggungan kousinan mamaramit montok momogonop kogugunoon diolo’; monokodung tinimungan di momoguno mooi do kopoindalan koposion di lobi osimbayan; monginkuri’ rontob komosikinan id Sabah maya’ ponguhupan po’ompus; om sabaagi tanda’ kopusohon om lisi koporintaan kumaa kasasanangan mogigiyon.
