Hajiji suminain plak Kinopoimpuunan Porjik Ponuridongan Loji Poopian om Panahasan Tumau Petroleum pasanganu Petroventure Energy Sdn. Bhd. id SOGIP doid ababayan dilo’.
KOTA KINABALU: Taman Pomorunan Tumau om Gas Sipitang (SOGIP) kosili ponokodung kumaa kosunion siktor ginoris i oponsol kopio montok kosunion po’ompus ikonomi pogun Sabah, ka di Boyoon Montiri, Datuk Seri Haji Hajiji Haji Noor.
Ka disio, SOGIP nakaanu ogumu’ kopoopuan kaampai kiwaya’ akawas wookon dilo’ Komponi Esteel montok kilang keluli (Green Steel) miampai gatang kopoopuan haro fasa soginumu’ RM20 bilion.
Minoboros isio, bobos wagu Projik Hub Ginoris, Tumau om Gas kigatang RM8.88 bilion (USD2 bilion) ilo’ nopo nga’ piuhupan id pialatan Sabah Oil and Gas Development Corporation (SOGDC) i mongulud do SOGIP om Gibson Shipbrokers Limited, potilombus dino koposili Sabab sabaagi hub agayo id siktor ginoris Asia Tenggara.
Hajiji guminambar miampai tongo’ naalap suai.
Mantad no dilo’ ka disio, koporintaan babaino’ diti tumilombus tumopot id kapanahakan sokodung poinponu’ kumaa kopoopuan i koowit koundaran timpu anaru kumaa mogigiyon Sabah.
“Otumbayaan oku miampai kalantaion projik diti, kosili ilo’ ponokodung kumaa kosunion pomorunan tumau om gas, potilombus dino koposili Sabah sabaagi hab ginoris i kiginoris tumopong id nayatan sompomogunan.
“Ounsikou tokou tu’ Sabah opuawang do intodonon sandad miagal do talun, galian, fauna, flora nogi’ mamamasi rahat. Koiyonon di kosudong, koyuon pulitik aadang, intodonon sandad di ogumu’, om ikonomi di mogisusuai wookon haal nokoposili Sabah sabaagi pilion kosudong montok papaapu’ labus,” ka disio id Ababayan Kinopoimpuunan Projik Ponuridongan Loji Poopian om Panahasan Tumau Petroleum id SOGIP, doid Longkod Konvensyen Sompomogunan Sabah (SICC) do hiti, di baino’.
Boyoon Montiri minoboros, Sabah i kikosiwatan agayo id intodonon tumau om gas, tantu’ nopo projik Ponuridongan Loji Poopian om Panahasan Tumau Petroleum, pasanganu Petroventure Energy Sdn. Bhd. i pikikiro kotimpuun do wulan Kaapat diti, kouhup id kopoingkawasan ikonomi pogun diti.
Ka disio, projik dilo’ kopokito ponuridongan loji panahasan tumau kirinumpos gisom 150,000 tuung sangadau (BPD) nogi’ kogogonopan kopoopian tumau soginumu’ 3 riong meter padu montok tumau mata’ om asil petroleum di natahas.
“Iti nopo iso’ po kopoopuan wagu di kosudong i tantu’ no do kopoinggirot nindikohon Sabah sabaagi hab pomorunan tumau om gas id ponongkoiyonon diti,” ka disio.
Hajiji minoboros, miampai ginayo tana’ 400 ekar id SOGIP, projik diti okon nopo ko’ koowit kopoopuan songkosuayan mitilombus (FDI) kigatang lobi USD3.5 bilion (RM15.5 bilion), nga nogi’ kopongimbulai somok 5,000 kosiwatan pakarajaan kumaa mogigiyon id pogun diti.
Pikikiro lobi 3,000 tulun ginoris pakakaraja’ gunoon id timpu ponuridongan projik diti om lobi 1,000 tulun ginoris pakakaraja’ pointatap gunoon ontok loji diti koindalan poinponu’.
“Koinsanai diti kapanahak ponokotanda’ osonong id inggisaman dati’ do mongimbulai kosiwatan pakarajaan kumaa mogigiyon. Toririmo ku poposotol koponsolon mongingkanan kopognuan ginoris karaja’ Sabah id oinsanan projik om kopoindalanan id pogun diti. Pokionuon ku tongo’ popoburu’ pomorunan mananud kogugunoon sandad diti, sabaagi ‘prinsip’ kopio id tonggungan tokou kumaa koburuon nokoiyonon,” ka disio.
Ka disio, projik diti nga’ kapaampai nogi’ kopoburuan jeti, kogogonopan ‘pemeringkatan’ tumau, makmal poniisan petroleum om linimput kopoindalanan.
Otumbayaan isio di mogisusuai pogintongan kopohompit sandad posorili’ i pinoindalan do Petroventure miagal Kajian Waya’ Sandad Posorili (EIA), kapatantu’ projik diti poburuon miampai poinggirot om kopiongoi di kogunoon pomorunan nogi’ koponsolon sandad posorili’ i nonuan koposotolan do koporintaan pogun.
