Hajiji miampai mobi’ rayat om lansanon mogigiyon Tuaran pinopokito linopian ‘skrol’ pason Toun Wagu Sina.
TUARAN: Kootuson Kabinet Pisompuruan montok minambatal buris puralan i pinaatag montok Muslim tumindapou ababayan okon Muslim nopo laang di osonong tu’ amu ilo’ kosudong id Sabah, ka di Boyoon Montiri (KM), Datuk Seri Haji Hajiji Haji Noor.
“Orohian oku popointalang do hiti do buris puralan i pinaatag dilo’ amu’ kosudong montok dati’. Do hiti, yati’ sopipantang.
“Onuon ku maan poiradan, amu’ oku kaanu do amu’ tumindapou kararamaian mogigiyon orukut ugama’ om tinaru id Sabah,” ka disio.
Minoboros id Festival Angpow pinaanjur di 10 koisaan Sina om NGO id Lintuhun Sri Sulaman do hiti di songkosodop, ka di Hajiji: “Soira’ nokoidu’ pogun i tinawon ku, minanahak oku pamantangan tohuri id Gereja St. Philip, Tamparuli. Ilo’ amu’ nokopongumpadan kotumbayaan ku toi pinoposili doho’ do amu’ songkuro Muslim. Oinsanan dilo’ kopohompit do akidah tokou,” ka disio po nogi’ ADUN Sulaman.
Kohondot dilo’, Hajiji minamason mogigiyon do amu’ aampawong di koyuon id koiyonon suai.
“Id Sabah, poinpasi tokuo id koyuon di otoronong om oulud. Ogumu’ dati’ i kiharo tompinai i mananud ugama’ sopisuai,” ka disio.
Boyoon Montiri pinopolombus nogi’ kopongunsikohan kumaa mogigiyon Sina tu’ tumilombus nosili tambalut id kopoburuan ikonomi pogun.
“Okon nopo ko ilo’, mogigiyon Sina’ nga’ pinopouhup nogi’ do koburuon balajaran om monongkounsikou yahai kumaa diolo’ sabaagi wookon mantad paganakan tagayo tokou,” ka disio.
Minoboros i Hajiji, po’ompus timpu pomorintaan disio sabaagi Boyoon Montiri, Koporintaan Pogun pinopoobi’ ginumu’ agayo montok koburuon sikul Sina sabaagi wookon mantad inggisaman mongingkawas balajaran id Sabah do poinpuli.
Toun di nakatalib nopo, ka disio, koporintaan pogun pinapabalanja’ somok RM480 riong montok koburuon ‘modal insan’ om balajaran.
“Iti amu’ insan kaantakai pogulu diti. Di pogulu, ginumu’ sikulasip di pinatahak tikid toun RM50 riong no. Nga’ po’ompus timpu ku, rinuhangan dahai kuminaa RM128 riong sontoun.
“Minanahak yahai sikulasip kumaa oinsanan i kosudong. Toun di nakatalib, pinopoikid yahai soginumu’ RM128 riong kumaa 12,000 susumikul,” ka disio.
Hajiji minoboros, mantad 12,000 susumikul dilo’, 5,000 nopo Mamasok Muslim, 5,000 Mamasok okon Muslim, om 2,000 susumikul Sina.
Pinointalang nogi disio do koporintaan pogun noondo nokosigampot ogumu’ kinalantaion, kaampia no suminain Pibatosan Piuhupan Komersial (CCA) miampai Petronas i minongukab ogumu’ kosiwatan montok Sabah id pomorunan tumau om gas.
Suai dilo’, ka disio, inggisaman osuau papaapu’ Sabah nga’ nokopongimbayat ogumu’ kopoopuan kumaa pogun diti.
Kalansanan disio mogigiyon Sina tumilombus monokodung koporintaan pogun di poinharo montok papatantu’ koinsanai palan koburuon aanu popoindalan do poinlantoi.
