KOTA KINABALU: Koupisan Kolidasan Pogun Sabah (JKNS) pinopoimagon kinaantakan nawanit taakanon i kotumbayaan mantad toksin sada’ buntal (buntol) id Sabah, miampai limo kes pinoruput di toun 2025.
Potunud Kolidasan Pogun Sabah Dr. Maria Suleiman minoboros, kinaantakan kumoiso’ kopohompit iso’ kes id Kota Kinabalu di ko 10tw Koiso’, naamot apat kes kawagu naantakan id Kota Marudu di ko 24tw Koiso’.
Ka disio, oinsanan nohompitan kiumur pialatan 15 gisom 48 toun. Yolo’ nokotoguang tanda-tanda miagal oonggungan, mongilob, boribisan, au’ kopurimon longon om gakod, nogi’ osolot momuhobo soira’ nakaakan sada buntol i binoli mantad pasar nokoiyonon om nonsok sondiri.
Mantad limo kes dilo’ ka disio, tolu nohompitan pinasaga’ minuli’ soira’ nakaanu pongusapan osopung id hospital, naamot duo kawagu kakal usapon om id koyuon di maamaha’.
Dr. Maria pinopointalang do sada’ buntol kiharo ‘tetrodotoksin’ (TTX), iso’ ponit toksin ‘saraf’ i koligogon kopio. TTX amu’ oilaan maya’ kosimbanon wotik, taau, toi koyuon takanon. Toksin diti nga haro nogi’ id pipiro ponit rahat suai miagal barangkas om tuntul rahat, nogi’ mamaamasi ‘amfibia’ miagal bonong kirasun.
“Tanda-tanda’ awanit TTX kaanu mimbulai id suang timpu 10 gisom 45 minit katalib kapangakan taakanon di noyomutan. Wookon tanda’ kaampai no amarod munung, dila’, om rabas, oruol tulu, soluhan, mongilob, boribisan, nogi’ kokimayon ‘otot’ pomuhoboan. Id kes di kadala’, kapataion aantakan id suang timpu 6 gisom 24 jam,” ka disio id kointalangan di tadau baino’.
JKNS minaganu laang kapanamanagan om pongilagan, kaampai manahak ponontudukan kolidasan kumaa di nohompitan om mogigiyon nokoiyonon.
Tulun ginumuan pinokianu do mongilag kopogonuan takanon i kotumbayaan kiharo TTX montok mongilag do kowonitan.
Nung kotoguang tanda-tanda’ osopung nawanit, pinosotol disio do sumikap mooi pokianu pongusapan id kolinik toi hospital dodoros.
Kointalangan kotilombus karait koligogonon TTX om laang pongilagan aanu id laman web Bohogian Ponontudukan Kolidasan om media sosial Komontirian Kolidasan Malaysia (KKM).
“JKNS poposotol kopio koponsolon kopurimanan mogigiyon karait koligogonon toksin diti. Unsubon dahai tulun ginumuan do mongilag kopongonuan sada’ buntol om sumikap mokianu pongusapan nung kotoguang tanda-tanda’ nawanit. JKNS tumopot miontong koyuon diti om manahak kointalangan kaawagu do potitikid timpu,” ka disio.
