Yahya (kotolu, gibang) pinapatahak dokumen MoU kuminaa di Zainal om sinasi’ di Arifin (tanga’).
KOTA KINABALU: Projik Pomuwalaian susumikul i doun kaawagu om osimbayan miampai kopikiikiraan Gatang Koburuon Kasar (GDV) RM1.3 bilion maan turidongo’ id pogun diti.
Projik pomuwalaian nopo dilo’ nga’ piuhupan do Kounsol Ugama’ Islam Sabah (MUIS) om songinan komponi mantad Sarawak, Zecon Berhad id koiyonon kosudong misampaping do Fakulti Pongubatan Univositi Malaysia Sabah mimpuun koompokon toun diti.
Soginumu’ 1,610 unit apartment maan wonsoiyo’ om koporumpos gisom 6,732 susumikul nokoiyonon om sompomogunan nogi’ sitaf, suai ko’ mongimbulai 600 kosiwatan pakarajaan kopohompit siktor abaal, kopoindalanan om ‘buruh’.
Projik i poindalanon id tolu fasa dilo’ kopohompit nogi’ do iyonon susumikul om sitaf i moningkanan do kosimbayanan om kosudong, suai ko’ kogogonopan mimpau ‘komuniti’ kaampai kopoburuan masjid, tadika om longkod panamangan tanak-anak nogi’ lot kadai, surupukaraja’ apartment, perpustakaan, gimnasium, kafeteria om surupukaraja’ tadau-adau di suai.
Montiri Sains, Tiknologi om Inovasi Pogun, Datuk Dr. Mohd. Arifin Mohd. Arif minongobi’ di Boyoon Montiri, Datuk Seri Haji Hajiji Haji Noor suminasi’ ababayan minisain Memorandum Pihunungan (MoU) id pialatan MUIS om Zecon Berhad id Longkod Konvensyen Sompomogunan Sabah (SICC), di tadau baino’.
Minongobi’ MUIS suminain MoU dilo’ nopo nga i Molohingon Agayo MUIS, Datuk Seri Yahya Hussin om Zecon nobian di Potunud Mongulud Tinimungan om Luguan Upisor Eksekutif, Datuk Zainal Abidin Ahmad om Ponorikohon Zecon Engineering Sabah Sdn. Bhd., Datuk Abdul Kadir Rosline.
MoU diti nakaanu kinapaasan mantad Kabinet Koporintaan Pogun Sabah di ko 12tw Kohopod om Iso’ 2024.
Naamot, kosongonuan tana’ kotilombus id siriba’ MUIS miampai karalnao’ konsep kopoburuan ‘Build’, ‘Lease’, ‘Mantain’ & ‘Transfer’ (BLMT).
Zecon Berhar kiharo nawawaya’an di agayo id siktor ponuridongan, siktor kogogonopan waig, siktor kopoburuan hartanah, siktor ginoris aanuguno om siktor kolidasan.
