Tun Musa (tanga’) minamaramit tandamato mantad di Christina.
KOTA KINABALU: Sabah tumilombus minggisom poposimbuat po ginumu’ kosuangon tutumombului montok mamagampot rikoton 3.5 riong do toun diti.
Montiri Ponombuluyan, Koubasanan om Sandad Posorili’, Datuk Seri Panglima Christina Liew minoboros, rikoton dilo’ kopiongoi di nokoruhangon 15 pontuludan mitilombus kumaa Sabah mantad mogisusuai pomogunan.
“Toun diti, rikoton dahai nopo tutumombului i rumikot mantad pomogunan ngaawi’ di sopisuai om pipiro projik ponombuluyan montok mongimbayat lobi kogumu’ tutumombului i rumikot mantad pototongkop pomogunan.
“Noondot diti, pasanganu tokou lobi mantad 15 pontuludan mitilombus. Pikikiro do toun diti, momoruhang yahai iso’ toi duo po pontuludan mitilombus.
“Ilo’ pogi’, momorikot yahai 3.5 riong nga’ kalansanan dahai do kaanu lobi mantad dilo’. Pialatan 3.5 riong gisom 4 riong toi 5 riong,” ka disio kumaa media katalib pinapaharo kotombuluyan apantang kohondot di Molohingon Agayo Pogun Sabah, Tun Musa Aman id Istana Seri Kinabalu, di tadau baino’.
Id kinotombuluyan dilo’, Christina pinapatahak kapagalapan pinotomod kumaa di Tun Musa montok tumindapou Ramai Walai Poingukab Toun Wagu Sina’ id longkod pogun, do ko 30tw Koiso’ diti.
“Iti nopo nga’ kumoinsan di Tuan Yang Terutama Tun Musa Aman tumindapou id karamaian dahai. Minamaramit isio kapagalapan diti om ounsikou tomod yahai.
“Magalap nogi’ yahai do mogigiyon montok mogowit paganakan kumaa karamaian diti tu’ ilo’ nopo nga’ i tisoiso’ no kosiwatan montok mamaramai Toun Wagu Sina’ i koimbayat ginawo miampai dahai,” ka disio.
Nokotindapou nogi’ id kinotombuluyan dilo’ i Monguhup Montiri Ponombuluyan, Koubasanan om Sandad Posorili’, Datuk Joniston Bangkuai; Monunurat Pointatap (SUT) Komontirian Ponombuluyan, Koubasanan om Sandad Posorili’ Datuk Josie Lai nogi’ Kumoduo SUT, Alesia Sion.
