KOTA KINABALU: National Unduk Ngadau Kaamatan (UNK) minongolimpupus kaparagatan Tonggungan Sosial Korporat (CSR) toun 2024 miampai ababayan kirati id Bukit Harapan Therapy Community, Inanam.
Inggisaman diti kituduan monokodung misi Bukit Harapan id koposodiaan panamangan, balajaran om kopogorisan kumaa tulun kikopomogunaan pinotomod, tulun okuri’ kohimboguian om tondu’ sosongulun.
Sabaagi somboogian mantad 7 Kaparagatan Koompokon Toun Bobos Osonong, ababayan diti pinopokito kaparagatan pirurumaan miampai mongingiyon, kinopoikidan babarang kogunoon, nogi’ pokikitanan koubasanan di nakalantoi National UNK.
Ababayan nopo diti nga’ mantad pisokodungan mogisuai bohogian, kaampai minsosongulun om tambalut ponokiilang nokoiyonon.
Ababayan diti rinamai miampai kinorikotan di tombului apantang miagal di Datuk Joseph Paulus Lantip, Monobubut Agayo KDCA; Datuk Joanna Datuk Kitingan, Ponorikohon Kounsol Koonduan KDCA om National UNK; Datin Angela Kok, Ponorikohon UNK Inanam om Karambunai; nogi’ i Puru Parlimen Sepanggar, Datuk Ts. Mustapha Sakmud i minanahak sokodung poinponu’ kumaa ababayan diti. Nokotindapou nogi’ i Puru Kounsol Koonduan KDCA HQ, Komiti Kounsol Koonduan KDCA Inanam, mobi’ KDCA Johor, om UNK 2024 National Top 7 winners. Pinosindak po nogi’ kinaramaion di tinimungan tongorohian KKD Tebobon.
Sokodung mantad tambalut ponokiilang agayo minonguhup pinapalantoi ababayan diti, ilo’ nopo Duopharma Healthcare, sabaaagi Tambalut Kolidasan Pinotomod National UNK 2024, pinopotoluod Flavettes Glow Vitamin C. H3ROS 4×4 Wheel Club, Tambalut Padsakaian Pinotomod CSR UNK 2024, pinapapanau tonggungan oponsol id kogogonopan, naamot Happy Place Restaurant & Bar pinopotoluod takanon tanga’adau kumaa oinsanan tutumanud.
National UNK tumilombus popokito tonggungan kumaa pisompuruan, kopomogompian tungkusan koubasanan om waya’ sosial kirati kumaa pototongkod Sabah.
Pinomupusan inggisaman CSR 2024 diti kopokito sunduan olisi om mogigiyon i nosili impohon do kotinanan. Puruankuasa’ National UNK minonongkounsikou au’ gigina’ kumaa koinsanai i pinapalantoi ababayan diti, potilombus dino kapatayad pason kalansanan om kounsikohan kumaa diolo’ i momoguno.
