Walai di naraag gama-gama’ kinaantakan tongus ologod id Jalan Simunul, Semporna di tadau baino’.
SEMPORNA: Kikiro 30 walai nogi’ songinan masjid nokotoguang kinaraagon om wookon dilo’ nopuhut gama-gama’ tongus ologod i naantakan id duo kokompungan poinsahau waig doid Jalan Simunul, di tadau baino’.
Tumanud ruputan Utusan Malaysia, id kinaantakan kikiro jaam ko 6.21 kosuabon, 20 walai id Kampung Selamat om 10 walai id Kampung Seri Aman di nohompitan.
Luguan Balai Bomba om Monumpasi (BBP) Semporna, Madzlan Sarman pinopoilo, soira nopo nakaramit pamalahawan agagou, sontinimungan limo puru pinogusa’ kuminaa kinoiyonon kinaantakan i poinsumpak id sinodu’ duo kilometer mantad BBP.
Minoboros isio, pinomorisaan osopung nokoilo haro 30 walai om songinan masjid nokotoguang kinaraagon nogi’ nopuhut gama-gama’ tongus ologod id goduo-duo kampung dilo’.
Nokotoguang nogi’ kinaraagon 20 padsakaian i nootungan do taap i notilib do tongus ologod.
“Pinomorisaan osopung nga’ nokoilo do naantakan ‘litar pintas’ gama-gama’ wayar noputut, nga’ aiso’ kinotutudan naantakan om kopogintangan powonsoiyon po’ompus timpu montok mongilag kaantakan di amu’ kasagaan,” ka disio id kopointalangan.
