Haji Hajiji Haji Noor
KOTA KINABALU: Koporintaan pogun maya’ do Koupisan Tana’ om Monunukat (JTU) toririmo opoduli’om minggisom poinbobos sinonong montok manalasai tikid upalai poinhompit tana’ om pinopoindalan ponukatan Ababayan Pinotomod Ponukatan Tana’ Mamasok Pogun Sabah (PANTAS) id pototongkop watas doid Sabah.
Boyoon Montiri Datuk Seri Haji Hajiji Haji Noor minoboros, koporintaan pogun minanahak koposuulan kumaa kapanahakan kosongonuan tana’ adat maya’ Ababayan PANTAS pointonod toun 2011.
Ka disio, gisom ko 31tw Kohopod 2024 soginumu’ 233,043 geran tana’ mamasok pogun Native Title/Field Register (NT/FR) kiginayo 1,225,088 hektar i pinalabus hinombo do 45 pihatus ginayo koinsanai geran tana’ i poinrojistor id Sabah.
“Iti nung piadangon di toun 2011 ilo’ nopo kiginayo 477,171 hektar toi 25 pihatus no mantad ginayo koinsanai garan tana’ di poinrojistor,” ka disio ontok minongolimpupus montok Koupisan Boyoon Montiri (JKM) id pitimungan Lintuhun Undangan Pogun (DUN) do hiti di tadau Kotolu.
Minanahak isio simbar kumaa atag di Jannie Lasimbang (Kapayan) i minokianu mooi kapatahakan geran tana’ adat insikapan.
Kumaa haal i nowit di Ewon Benedick, ka di Hajiji, JTU popoindalan pogintongan om kopohimaganan id kinoiyonon miampai monuntud mimpuun kolimpuunon toun 2025 id 10 kampung i nokoulud id kinoiyonon DUN Kadamaian.
Kohompit haal kopoimaganan watas kinoiyonon mamasok pogun id Kampung Unta, Pancuran, Wawasan I om II, Damai I om II nogi’ Kampung Dusun di Datuk Mohamaddin Ketapi (Segama), Boyoon Montiri minoboros kopohimaganan watas kinoiyonon mamasok pogun montok kampung ngaawi dilo’amu’ aanu monimbang tu’poinsuang id tana’ kigaran om koiyonon ponimbuuhan waig.
