Dr. Joachim (mongigit bondira’) pinopoimpuun do ‘flag off’ Jelajah Tinimungan Komulakan PBS.
KOTA KINABALU: Tinimungan Komulakan Parti Bersatu Sabah (PBS) pinopoimpuun ababayan pamanahan di tadau baino’ kopihondot kapamaramaian Tadau Sabah om Kongress Toun-toun parti.
Ponowoli Presiden PBS, Datuk Seri Dr. Joachim Gunsalam pinopoimagon kinopoungkoyutan konvoi Jelajah Pergerakan Pemuda (Tinimungan Komulakan) PBS dilo’ id Plaza Tanjung Aru, do hiti di konihab (6tw Kohopod).
Konvoi pinakaya’an id Tawau dilo’ kapaampai pipiro padsakaian 4WD.
“Ababayan jelajah diti nga’ kituduan nogi’ montok popotonu’ do PBS kosudong id kopoburuan montok mogigiyon Sabah,” ka di Dr. Joachim i po nogi’ Kumoduo Boyoon Montiri II.
Dr. Joachim (tanga’) ontok minanahak boboroson.
Dr. Joachim minonongkounsikou po nogi’ di Tinimungan Komulakan, PBS Bohogian N.22 Tanjung Aru om oinsanan i nakaampai id ababayan dilo’.
“Kumaa toinsanan Komulakan i nakaampai id ababayan diti, pointalangon kumaa oinsanan mogigiyon do kakal tokou pointonggoi id kopoburuan miampai Gabungan Rakyat Sabah (GRS). Kada’ poninong toi pombohit di suai po.
“PBS nopo nga’ parti koiyonon bobos otuo, mositi’ tokou misokodung miampai tongo’ parti kinoiyonon.
“Pomilian Agayo Pogun momok-somok om ogumu’ tongo’ totondos om haal ngaawi’ di winonsoi-wonsoi i momurilong do mogigiyon. Miampai di Puru Kounsol Akawas (AMT), popointalang tokou ningkakaton tokou pointatap miampai do GRS,” ka disio.
Dr. Joachim (tanga’) miampai dilo’ oinsanan nokotindapou pinapalahat do ‘Bersatu’.
Minamason nogi’ isio kumaa oinsanan Exco Komulakan i humombo, soira’ id talun-alun mositi’ papatantu’ koumoligan.
“Stay safe, stay United. Porikoton pason kumaa oinsanan mogigiyon do PBS nopo nga’ songinan parti i osompuru om popoburu’ montok tulun Sabah.”
Luguan Exco Tinimungan Komulakan, Dr. Christoper Mandut i minomuruan konvoi minonongkounsikou kuminaa di Dr. Joachim i minonguhup ababayan dilo’.
Nokotindapou nogi’ i Timbang Presiden PBS, Datuk Johnny Mositun, tongo’ AMT, Luguan Bohogian N.22 Tanjung Aru, Louis Lai, Exco Koonduan om Komulakan.
