Kassim (kotolu, gibang) pinaaptahak toluod Boyoon Montiri kuminaa di Ponorikohon PIBG SMK Tamparuli, Michael Kadum.
TAMPARULI: SMK Tamparuli nakaramit ponguhupan mantad di Boyoon Montiri, Datuk Seri Haji Hajiji Haji Noor montok papagaan tonggungan nosusuhut kinaantakan tongus osiau i nokoponilib wookon taap sikul dilo’ di ko 18tw Kosiam katatalib.
Nosusuhut kinaraagon dilo’, 350 susumikul noumpadanan om montok naamot asansagan yolo’ miilang kelas toi minundaliu kuminaa lintuhun sikul montok mindalan balajaran tadau-adau.
Wookon mantad taap SMK Tamparuli i notilib tongus osiau di ko 18tw Kosiam katatalib.
Ponguhupan mantad Boyoon Montiri dilo’ pinotunui di Luguan Monunurat Pulitik Datuk Haji Kassim Razali kuminaa di Ponorikohon Koisaan Molohing om Mongingia’ SMK Tamparuli, Michael Kadum om sinasi’ di Molohingon Sikul Dr. Justin Rumpod di tadau baino’.
Daamot dilo’, Komontirian Balajaran maya’ Upis Balajaran Watas pinokianu monginsikap karaja’ kopongundaran id SMK Tamparuli i kiharo 2,236 susumikul om po nogi’ sikul bobos agayo id Tamparuli.
