Hajiji suminain plak kopihondot kinopoimpuunan projik perintis id Jalan Ongkilan, Kota Marudu di tadau baino’.
KOTA MARUDU: Koporintaan Pogun maya’ Komponi Poinhompit Koporintaan (GLC) Tinimungan Sawit Kinabalu om Koupisan Pomutanaman minonimpuun projik perintis (ponimpuun) parai kiginayo 100 hektar id Kampung Ongkilan, do hiti.
Boyoon Montiri, Datuk Seri Haji Hajiji Haji Noor minoboros, projik ponimpun dilo’ kouhup koporintaan pogun mongingkawas rontob kosukupan tinan (SSL) Sabah kumaa 60 pihtus dumontol 2030.
“Koumoligan takanon nopo kotongobon agayo global om Sabah amu’ pinoidu’. Mogigiyon Sabah momoguno sokukuri’ 400,000 tan watas tikid toun, naamot kopolobusan wagas suang pogun kapangaba’ no do 20 pihatus mantad pomogunaan pogun.
“Nosili tonggungan koporintaan montok monompuan koumoligan takanon miampai poingkomilo om kiwaya’ do monumboyo’ kopokionuan mogigiyon, kosuul no wagas,” ka disio id ramai kinopoimpuunan projik dilo’ di tadau baino’.
Sawit Kinabalu minomoguno koinsanai intodonon di haro om tiknologi kaawagu dau, kaampai dron, id kopoindalanan om kapapanahan pananaman parai dau, nogi’ poom waig om sistom pomuwoigan di lobi poingulud montok projik kigatang RM5 riong dilo’.
Hajiji minoboros, watas diti haro kikiro 2,600 hektar ranahon nokologos.
“Kohondot dilo’, laang kiguno onuon montok papatantu’ koiyonon ranahon parai di poinlogos diti aanu tomposion kawagu. Mokianu oku lobi kogumu’ GLC id Sabah momit inggisaman Sawit Kinabalu,” ka disio.
Hajiji om Kumoduo Boyoon Montiri I po nogi’ Montiri Pomutanaman, Ponginsadaan om Pomorunan Akanon Datuk Seri Dr. Jerffrey Kitingan minintong koiyonon ranahon parai.
Boyoon Montiri mokianu nogi’ tana’ pasanganu GLC di amu’ ginuno poburuon montok pomutanaman kosuul no parai i aanu powonsoiyon miampai ponguhupan Komontirian Pomutanaman, Ponginsadaan om Pomorunan Akanon Pogun.
“Inggisaman Sawit Kinabalu nopo kopiongoi di angkab koporintaan montok popoburu’ asil nimbulayan parai om wagas pogun.
“Popo’iliu oku angkab di akawas mooi do projik pananaman parai Sawit Kinabalu maan poinggoyoo’ montok mamagampot rontob ikonomi om mongingkawas kountungan tinimungan,” ka disio.
Boyoon Montiri minoboros, koporintaan pogun toririmo monokodung inggisaman i koowit koburuon ikonomi di aparagat, ogirot om kopomogot naangayan koposion mogigiyon id pototongkod Sabah.
Ounsikou isio nokoilo do id inggisaman popoburu’ Kota Marudu, Sawit Kinabalu, suai ko’ pinopoindalan kabun om kilang piasawu sawit, nga’ pinapapanau tonggungan oponsol id siktor suai, miagal projik kopomibitan sada’ barramundi (siakap) id Langkon, i kotilombus kounsub pomogunan takanon id watas diti.
“Unsubon ku oinsanan koupisan koporintaan om kotinanan poinggompit toririmo maganu laang aparagat id kapagarasan siktor kosunion ikonomi agayo pogun miagal di poinsuang id Sondikoton Sabah Maju Jaya,” ka disio.
