Hajiji minonorikohon mitingan MTPNg.
KOTA KINABALU: Boyoon Montiri, Datuk Seri Haji Hajiji Haji Noor minonuhu’ do koupisan om agensi montok monoibau kaantob i kopomohimpogong kopoindalan projik koburuon id Sabah do osisikap.
Minonorikohon mitingan Kounsol Karaja’ Koburuon Pogun (MTPNg) id Menara Kinabalu do hiti di tadau baino’, Boyoon Montiri minoboros, haro 1,218 projik i masanaan poindalanon id Sabah nga’ 25 mantad dilo’ pinosompini’ sabaagi “sumakit”.
Projik sumakit diti kaampai no ginoris, waig, lotirik, sikul, kogogonopan kolidasan om kogogonopan suai i amu’ nopongo id timpu di pinatantu’.
Kounsol dilo’ nga’ nonuan nogi’ kopointalangan karait di Puruankuasa’ Pinotomod Miamung Pogun-Pisompuruan i tinuridong i kikaraja’ do miontong-ontong projik koburuon id Sabah, lolobi no projik kikobolingkahnagan.
Karait do ababayan koponoibahan mosikin kadala’ (tegar), kounsol dilo’ nonuan kopointalangan do sekretariat SMJ do Sabah id waya’an di kohunung montok mamagampot rikoton mosikin tegar sifar.
Boyoon Montiri minongomi do oponsol o Koporintaan Pogun maya’ sekretariat SMJ popointutun koponguhupan montok mongingkuri’ po do kaantakan mosikin tegar id pogun diti.
Nokopogulu id boboroson disio, i Hajiji minongunsub agensi popoindalan Pisompuruan om Pogun magawi-awi’ pomogunaan RM6.6 bilion i pinoobi’ do Koporintaan Pisompuruan id siriba’ Bajet Pogun 2024 montok kopoburuan id Sabah do toun diti.
Kopoobian dilo’ kapaampai mogisusuai ababayan koburuon kaampai panapad liyud, ponondulian Baang Tuaran, ponuridongan sikul wagu, monginsonong sikul nakalaid om monuridong kolinik wagu nogi’ premis Tamu Desa.
“Oponsol kopio montok koinsanai koupisan om agensi id Sabah momoguno poinponu’ do kopoobian om kopolintuhunan kuasa’ montok agensi teknikal id sabah do popoindalan projik koburuon i kapagawi’ balanja’ id siriba’ RM50 riong montok posindak kosunion ikonomi pogun,” ka disio.
Minoboros isio, agensi popoindalan Pisompuruan om Pogun mositi’ popigirot pironmutan nayatan diolo’, mongingkawas naangayan om mongingkawas sinonong projik montok koundaran mogigiyon.
“Nakatalib tokou nodii do pintangaan toun mantad dilo’ mimang oku dati’ ngaawi’ monorisid om mogintong naangayan tokou kumaa di rikoton sompoopori id sunduk kopoindalanan projik koburuon Pisompuruan om pogun.
Gisom ko 15tw Koturu’ toun diti, Sabah nakapabalanja’ RM1.791 bilion toi 35.46 pihatus nung piadangon di naangayan pomogunon soginumu’ 43.45 pihatus id siriba’ ‘Rolling Plan’ 4 Palan Malaysia Ko-12.
Tongo’ Kumoduo Boyoon Montiri, Datuk Seri Dr. Jeffrey Kitingan, Datuk Seri Dr. Joachim Gunsalam om Datuk Ir. Shahelmey Yahya om Montiri Kabinet suai nga’ nokotindapou.
Mitingan dilo’ notindapou nogi’ di Montiri Pisompuruan, io’ Datuk Armizan Mohd. Ali dii Datuk Ewon Benedick.
