Tun Juhar (koduo, gibang) ontok pinopoimagon ababayan dilo’ miampai intolu tuntung tagung.
KOTA KINABALU: Koporintaan pogun pinapatahak kinopoobian somok RM157 riong kumaa 29,059 mamaramit Ponguhupan Warga Emas (BWE) gisom ko 30tw Milau (Kohopod om Iso’) toun diti.
Montiri Koburuon Mogigiyon om Kasasanangan Rayat, Datuk James Ratib minoboros RM500 sombulan maan patahako’ kumaa mamaramit skim ponguhupan kousinan Koupisan Surupukaraja’ Kotundunan Am Sabah maya’ BWE.
“Montok mamajamin warga emas (tulun nolohing) kotilombus oumoligan om kaanu panamangan poinpatut, Koupisan Surupukaraja’ Kotundunan Am Sabah nga’ pinopoindalan nogi’ Ababayan Surupukaraja’ Monguhup id Walai (Home Help Services) hinombo soginumu’ 759 tulun nolohing nakaanu koundaran,” ka disio id Ramai Kinopomoromitan Tadau Tulun Nolohing Nayatan Pogun Sabah Toun 2023 do hiti di tadau Kotolu.
Teks boboroson disio binasa’ di Monunurat Pointatap Komontirian Koburuon Mogigiyon om Kasasanangan Rayat, Maria Chong id ramai i notindapou di 150 tulun nolohing.
Ramai kinopoimaganan pinoindalan di Molohingon Pogun, Tun Juhar Mahiruddin om notindapou nogi’ di sawo, Toh Puan Norlidah R.M Jasni.
James pinopoilo noig’ do komontirian disio (KPMKR) nga’ pinopoindalan ababayan Tonggungan Sosiol Korporat (CSR) miampai tambalut strategik montok monguhup momogompi’ kotundunan tinimungan tingkananon kopiongoi di konsep ‘Kotundunan Tonggungan Toinsanan’.
“Iso’ mantad ababayan CSR miampai bohogian korporat nopo nga’ Ababayan Homeward i po nogi’ pisokodungan pialatan Koupisan Surupukaraja’ Kotundunan Am Sabah om Petronas,” ka disio kawagu.
Pinointalang disio do soginumu’ 21 Longkod Ababayan Tulun Nolohing (PAWE) i tinuridong id pogun Sabah miampai ginumu’ puru poinrojistor soginumu’ 5,980 tulun nolohing gisom di wulan Milau 2023.
Nokotindapou po nogi’, sawo di Boyoon Montiri Sabah, Datuk Julia Salag i po nogi’ Molohingon Kotinanan Muafakat Titipan Amal Sawo Mobi’ Rayat, Gabungan Rakyat Sabah (Mutiara GRS), Monguhup Montiri Koburuon Mogigiyon om Kasasanangan Rayat, Datuk Flovia Ng, Datin Seri Cecilia Edwin Kitingan, Datin Seri Linda Ewit om Ponorikohon PUSPANITA Raan Sabah, Datuk Dr. Nuinda Alias.
