Hajiji Noor (kaapat, gibang) minonorikohon Mitingan Kounsol Akawas Gagasan Rakyat id Kota Kinabalu konihab.
KOTA KINABALU: Ponimbanan koundangan parti wookon atag i maan pawalado’ pibabarasan id Pitimungan Agayo Tounan Parti Gagasan Rakyat Sabah (Gagasan Rakyat) do ko 13tw Kohopod om Iso’ diti.
Tumanud Utusan Malaysia, Boyoon Montiri i po nogi’ Presiden Gagasan Rakyat, Datuk Hajiji Haji Noor minoboros, ogumu’ hal di maan pogibabarasai id pitimungan kumoinsan Gagasan Rakyat do tulan Kohopod om Iso’ diti kaampai no boboroson ‘dasar’ presiden om ponimbanan Koundangan parti.
“Tongo’ pembahas nga’ nopili’ tokou no mantad zon-zon sabab yati’ haro 73 bohogian mantad dilo’, okon doti’ ko’ koinsanai bohogian kaanu membahas.
“Pinili’ tokou dati’ yolo’ i kikabaahan om tulun di kiharo nawawaya’an id potitikid bohogian montok membahas boboroson dasar Presiden om atag ponimbanan Koundangan parti,” ka disio ontok mitingan Kounsol Akawas Gagasan Rakyat, di sodopon konihab.
Minoboros isio, kiginumu’ lobi 2,000 puru mantad 73 bohogian kaampai mio’ontong mimpoopori kotindapou id pitimungan diti baino’.
Ka disio, pitimungan agayo dilo’ maan pohoroo’ doid Longkod Konvensyen Sompomogunan Sabah (SICC).
Pinointalang disio, posodiaan montok pitimungan dilo’ osonong kinapapanaho’ om kalansanan pamanahon pitimungan dilo’ nga’ oturundus nogi.
Minongomi kotilombus ka disio, kosompuruan Gagasan Rakyat do noondo diti nokosigampot no do 236,000 tulun om pikikiro dumontol tulan Kohopod om Duo diti, Gagasan Rakyat karamit lobi 300,000 puru.
Gagasan Rakyat pinoimpuun miampai pohimagon di ko 2tw Kotolu katatalib soira’ di Hajiji miampai koinsanai Puru Lintuhun Undangan Pogun (ADUN) Parti Pribumi Bersatu Malaysia (Bersatu) luminabus mantad parti di ko 10tw Kohopod om Duo 2022.
