Hajiji Haji Noor
KOTA KINABALU: Koporintaan pogun mangadang montok popoobi’ tana’ pogun kumaa Koisaan Popoburu’ Pomuwalaian om Hartanah Sabah (Shareda) montok monuridong walai ogoosan sumanganu montok kategori B40 om M40 id Sabah.
Boyoon Montiri, Datuk Seri Hajiji Haji Noor minokinau Shareda do misokodung miampai koporintaan pogun montok poposodia’ walai ogoosan sumanganu montok rayat.
“Id bohogian dahai, poinsodia’ yahai mangadang montok popoobi tana’ koporintaan id Sepanggar doros hiti montok poburuon do Shareda. Iti miampai katatapan do gatang walai ngaawi’ diti poinsiribaon mooi do id kogoosan tinimungan B40 om M40 i komoyon do kaanu koundaran bobos agayo mantad kopoburuan diti.
“Iti nga’ tonggungan ngoi’ koporintaan pogun montok popoburu’ pomorunan hartanah,” ka disio id Ababayan Shareda Nite doid Magellan Sutera Harbour do hiti di kosodop. Boboroson disio binasa’ di Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam.
Ka di Boyoon Montiri, koposodiaan walai kumaa diolo’ i kinindopuan osiriba’ nopo nga’ tingkananon kopio koporintaan pogun do noondo diti, kopiongoi di RM125.6 riong Walai Mesra SMJ doid koinsanai 73 DUN id Sabah.
Hajiji nga’ ounsikou Shareda ‘proaktif’ doid kopogowitan hal kapaampai pomorunan, wookon dilo’ karait do ‘perimeter’ om koponguludan montok MM2H Sahah; atag montok pongigitan pajakan solinaid 99 toun inwoguan do soiraira timpu surupukaraja’ om; kopoindalanan i-Miliki, iso’ po laang ponguhupan kogoosan i kaagal do Kimpin Kosongonuan Walai (HOC).
Dr. Joachim (koduo, wanan) i minongobi’ di Boyoon Montiri ruminamit tandamato mantad di Chua.
Karait do Sabah Malaysia Walai Koduoku (SMM2H), minoboros isio enakmen kopohompit SMM2H di nosimak dilo’ maan pawalado’ id Lintuhun Undangan Pogun (DUN) Sabah do amu’ no alaid.
“Nohulit ku do soira’ SMM2H nokoimpuun, mongiikiro yahai kosuangon bakat, kabaahan om kopoopuan, i kapanahak koundaran kumaa Sabah. Ababayan SMM2H, miampai ‘input’ mantad mogisusuai bohogian kikoundarna kaampai Shareda, nosorisid montok poposili Sabah lobi koimbayat kumaa mamasok songkosuayan i orohian mundaliu om miyon id pogun diti,” ka disio.
Hajiji nga’ kaakun nogi’ do papasaga’ momomoli lot Mamasok papadagang hartanah diolo’ miampai amu’ pongkomimiahan om kapasaga’ diolo’ kaanu koundaran mantad kapadagangan hartanah kumaa momomoli nokoiyonon om songkosuayan.
Minoboros isio, nopibarasan disio hal diti miampai Presiden Shareda, Datuk Chua Soon Ping montok mongukab tontiil karalano’ kopongilihan lot Mamasok mantad limo gisom sifar toun montok oinsanan kopoburuan wagu id Sabah.
“Nopoilaan ku no kumaa Komontirian Koporintaan Koiyonon om Pomuwalaian montok monorisid hal diti om maganu laang poinpatut. Sanganu Mamasok kotilombus karamit ‘diskaun’ poinsusuul limo pihatus montok lot Mamasok,” ka disio.
Hajiji minoboros, koporintaan pogun tumopot montok monokodung tiknologi Linimput Otomou monotk mongunsub lobi kogumu’ popoburu’ id Sabah monuridong projik i mananud inggisaman Otomou.
“Hiti no o koinsanai pomorunan gumura’ kumaa global, om koporintaan pogun manu papatantu’ diti nga’ aramit guno id suang pogun,” ka disio.
