Tun Juhar (tanga’) miampai Toh Puan Norlidah kinoruhang dio’ Dr. Joachim (kaapat, gibang) dii James (kotolu, gibang) minomutul kek kinouliton toun kinosusuon pinotomod disio di ko -70.
SANDAKAN: Hopod om iso’ institusi kotundunan sopipoopori nakaramit toluod kousinan kigatang RM1,000 mantad Puruankuasa’ Induk Pamaramaian Kinouliton Toun Kinosusuon Pinotomod Ko-70 di Molohingon Pogun Sabah, Tun Juhar Mahiruddin.
Toluod pinotunui di Tun Juhar i kinoruhang di Kumoduo Boyoon Montiri II, Datuk Seri Dr. Joachim Gunsalam po nogi’ Ponorikohon Puruankuasa’ Induk, Montiri Koburuon Mogigiyon om Kasasanangan Mogigiyon Datuk James Ratib om Potunud Koupisan Surupukaraja’ Kotundunan Am Sabah, Jais Asri id Ababayan Jamuan Teh Miampai Tanak-Anak Posuulon om Tanak Yatim do hiti, di tadau Kotolu.
Tongo’ mamaramit ponguhupan kapaampai do Kotinanan Pomolingosan Id Mogigiyon (PPDK) Indah Jaya, PPDK Gum Gum, PPDK Sinar Wawasan Kinabatangan om LongkodPanamangan om Pintoriningan Montok Tulun Bolou Sabah Kompleks Penyayang Taman Cahaya Sandakan.
Nakaramit nogi’ do toluod, Ababayan Balajaran Pinotomod om Integrasi (PPKI) SMK Muhibbah, Ababayan Balajaran Pinotomod SK Muhibbah, Ababayan Balajaran Pinotomod SK Bukit Garam Kinabatangan, Koisaan Tulun Bosukon Sandakan, Sabah Cheshire Home and Services Sandakan, Longkod Panamangan Tangaanak Yatim / Mosikin Al-Yakin Sandakan om Longkod Panamangan Walai Kotundunan Selawat Nabi Sandakan.
Suai ko ilo’, Tun Juhar nga’ pinapatahak nogi’ toluod RM10,000 sopipoopori kumaa limo tinan sikul nopili’ id Sabah mantad Konsul Republik China id Kota Kinabalu, Huang Shifang om Yayasan Nur Jauhar montok poposodia’ kogogonopan longkod intodonon sikul ilo’ nopo nga’ SK Magandai Kota Marudu, SK Bawang Beluran, SK Pekan Pensiangan, SK Gusi Ranau om SJK(C) Sin Boon Sindumin.
Id ababayan dilo’, soginumu’ 140 tanak-anak kaampai manananud rinamai om linihis di pipiro pokikitanan di tongo’ susumikul sikul osiriba’ om tanak-anak amu’ songkuro kohimbogui, om minamaramt titungkap i pinatahak di Toh Puan Norlidah om kinoruhang di Kumoduo Boyoon Montiri II, Datin Linda Ewit nogi’ Ponorikohon Puspanita Raan Sabah, Datuk Dr. Nuinda Alias.
