Hajiji suminain plak kahandaman. Id ponong wanan nopo nga’ i Upisor Watas Membakut, Ibrahim Terki.
MEMBAKUT: Boyoon Montiri, Datuk Seri Hajiji Haji Noor pinopolulus songinan Lintuhun Mogigiyon wagu montok Membakut kopiongoi di kinopoingkawasan rontob ko’oitan dilo’ kumaa songinan watas poinponu’.
Minoboros isio, kosudong o Membakut kaanu Lintuhun Mogigiyon wagu, miagal pinaatag di Montiri Sains, Tiknologi om Inovasi, Datuk Dr. MOhd. Arifrin Mohd. Arif I po nogi’ ADUN Membakut, sabab no lintuhun di haro mantad babaino’ diti id koyuon di nakalaid.
“Manahak oku jominan Membakut kaanu Lintuhun Mogigiyon wagu toun tiso’. KOs maan potontuo’ do Upis Watas om koupisan teknikal,” ka disio.
I Boyoon Montiri nga’ suminain nogi’ do plak momuhondom kinopoimogotan rontob ko’oitan Membakut kumaa watas poinponu’ id Sekretariat Watas do hiti di tadau baino’.
Hajiji miampai lansanon Gagasan Rakyat om mongongobi’ Membakut.
Membakut pinoimagon sabaagi watas poinponu’ di ko 30tw Kotolu 2022, kapaampai mantad duo watas Lintuhun Koundangan Pogun (DUN) ilo’ nopo nga’ Membakut om Bongawan.
Nokopogulu i Hajiji po nogi’ Presiden Parti Gagasan Rakyat Sabah (Gagasan Rakyat) pinopoimpuun Gagasan Rakyat Bohogian Membakut id Lintuhun Poingukab Membakut.
Minomohulit isio do sundung wagu nogi ilo’ turidongo’ turu’ wulan di nakatalib, Gagasan Rakyat nokoponuridong 73 bohogian id Sabah om iso’ id Labuan.
“Oondos yahai yahai Gagasan Rakyat nakaanu pinopogura’ kukumaraja’ dau miampai opulokis. Iti no ponokotanda’ di osonong do Gagasan Rakyat om Gabungan Rakyat Sabah (GRS) kosigampot naangayan di osonong id pomilian agayo pogun obontol,” ka disio.
Hajiji minoboros, GRS mimang kalantoi pomilian agayo sabab “yahai mimang tumilombus popoburu’ Sabah.”
Ponorikohon GRS po nogi dilo’ nga’ ounsikou okito Gagasan Rakyat rinamit osonong do mogigiyon Sabah i orohian do obian parti nokoiyonon.
“Sabaagi parti orukut tinaru, yati’ (Gagasan Rakyat) poposuul pulitik nokoiyonon om kopoburuan. Iti no posunduran bobos osonong ninggisaman tokou montok rayat Sabah,” ka disio.
“Gagasan Rakyat tinuridong montok monumboyo’ angkab rayat. Yahai orohian misokodung miampai parti nokoiyonon suai id GRS,” ka disio kawagu.
