Amir miampai Ponorikohon Kotinanan Momukabun Pogun Sabah, Datuk Mohd. Nazri Abdullah id Ababayan Kopointalangan Tongunggan Puru Nuludan Potunud (AJP) om Puru Kotinanan Momukabun (PP) Id Projik Ngaawi’ doid Hotel Promenade, Kota Kinabalu di konihab.
KOTA KINABALU: Lembaga Kotinanan Momukabun (LPP) masaan popoindalanduomini estet parai id duo kinoiyonon id Sabah sabaagi inggisaman mongingkawas kopolobusan asil parai om nindopuan mororobuat id pogun diti.
Kumoduo Luguan Potunud (Kopoburuan) LPP, Amir Matamin minoboros, mini estet kiginayo 150 hektar dilo’ pinoindalan id Terusan Sapi, Beluran om Kampung Kabatasan, Pitas.
Ka disio, projik dilo’ pinoindalan maya’ kinopoobian di 2021 om 2022 montok momoruhang kopolobusan parai om monguhup mororobuat id kinoiyonon dilo’ popoindalan pananaman parai miampai pongulud.
“Id Sabah, maya’ kinopoopian di 2021 om 2022, yati’ haro mini estet id Terusan Sapi, Beluran om Kampung Kabatasan, Pitas miampai ginayo 150 hektar.
“Goduduo dilo’ kakal poindalanon om piantangan tokou kinoburuon dilo’. Kalansanan miampai kousinan diti aantakan koingkawason asil parai om nindopuan momumutanom,” ka disio ontok rinubaan magaganu habar katalib Ababayan Kopointalangan Tonggungan Puru Nuludan Potunud (AJP) om Puru Kotinanan Momukabun (PP) Id Projik Ngaawi’ Kopoburuan, do hiti di konihab. Nokotindapou nogi’ Ponorikohon Kotinanan Momukabun Pogun (PPN) Sabah, Datuk Mohd. Nazri Abdullah.
Amir minoboros, suai ko’ mini estet parai, LPP nokogompit nogi’ id kopoindalanan Projik Smart Sawah Berskala Besar (Smart SBB) i poposotol kopoindalanan pananaman parai miampai poingulud.
Id timpu di miagal, ka disio, LPP nga’ nokogompit id koposodiaan kogogonopan injin om kogogonopan montok monguhup mororobuat ranahon id sunduk pomogunan injin montok koonuan asil di lobi kagayo.
Ka disio, montok toun diti LPP Sabah nakaramit 23 injin pongomot om traktor wagu montok mongingkawas po do pananaman parai id pogun diti.
“Mantad dilo’ id Palan Malaysia Ko-12 (RMK12), moningkanan do kararalano’ om ‘automasi’ montok monguhup momumukabun id sunduk kogogonopan injin,” ka disio.
Minoboros isio, goduduo ababayan LPP dilo’ ilo’ nopo nga’ koposodiaan injin om projik pananaman parai kituduan do poposindak kopolobusan asil parai.
Poingkuro po id Sabah, kakal tokou potoguang do kobolingkahangan pomuwoigan. Nga’ miampai koinsanai, maya’ duo ababayan diti umbalan tokou mongingkawas asil parai id pogun diti,” ka disio.
Naamot dilo’, minoboros isio, aiso’ komoyon do Sabah nonuan kinopoobian kousinan di okoro’, ilo’ nopo nga’ id pialatan onom gisom turu’ pihatus mantad ginumu’ koinsanai poruntukan i pinoikid koporintaan kumaa LPP id poliliput pogun potikid toun.
Ka disio, kopoikidan poruntukan kumaa tikid pogun tumanud di upalai projik i pinotoguang kumaa LPP.
“Aiso’ roitan do onom pihatus toi okuri’, ilo’ lobi kumaa kogunoon nokoiyonon do mongupalai projik sabab LPP poposodia’ ababayan. Nung kosudong ilo’ di skop om nunu i kiguno poindalanon, nga’ onuan tokou.
“Potontuon tokou do poruntukan di patahakon koporintaan kalantoi om kaanu mongingkawas sosio ikonomi. Sabab dilo’ id pongintongan projik imuayon tokou kopio om manahak no kumaa diolo’ i kosudong kousinan montok popoindalan projik.
“Okon ko’ manahak no do ‘touch point’. Mimang tokou poruntukan koporintaan dilo’ kaanu mongingkawas nindopuan miampai po’ompus, okon ko’ sontoun duo nopo,” ka disio.
Suminuku’ isio di poruntukan pinoidiki LPP id Sabah i RM4.9 riong no toi turu’ pihatus mantad RM71 riong do toun diti om RM3.9 riong toi onom pihatus no mantad di RM71 riong toun di nakatalib.
Id hal dilo’ ka disio, Kotinanan Momukabun kiguno gumompit miampai aparagat id ababayan kopoburuan pomutanaman montok monguhup puru miampai momoguno poinponu’ poruntukan pinosodia’ LPP.
“Nga’ momoguno tokou upalai om pomusarahan mantad koiyonon sompoopori poingkuro tokou kaanu popogura’ sabaag iso’ ‘sinergi’ mooi do momumukabun tokou oobian mantad sunduk projik di orohian poindalanon.
“Otopot nopo koporintaan id siriba’ PMX opoduli’ koio kumaa tinimungan momukabun. Mamaramit tokou do bohit om kobolingkahangan di haro id hal poingkuro tokou kaanu monguhup mongingkawas nindopuan puru om Kotinanan Momukabun id sub siktor pomutanaman,” ka disio.
