Tun Juhar (kaapat, wanan) guminambar miampai di Joachim (kaapat, gibang) om tombului di nokotindapou.
KOTA KINABALU: Soginumu’ 14 ababayan nulud do koporintaan pogun montok mamaramai kinouliton toun kinosusuon pinotomod ko-70 Molohingon Pogun (TYT) Sabah, Tun Juhar Mahiruddin.
Kumoduo Boyoon Montiri II Datuk Seri Dr. Joachim Gunsalam minoboros tongo’ ababayan dilo’ poindalanon id pososorili’ Kota Kinabalu mimpuun ko 6tw Kohopod obontol.
“Soginumu’ 14 ababayan i nulud tokou montok mamaramai kinouliton toun kinosusuon Tuan Yang Terutama Tun i kotimpuun do ko 6tw Kohopod obontol ilo’ nopo nga’ ontok tadau Kolimo miampai ababayan ‘doa selamat’ om ‘tahlil’ id Masjid Nurul Hikmah, Bukit Padang.
“Ontok ko 7tw Kohopod nopo, papaharo tokou ababayan pinghuyudan id Padang Merdeka susuhoton do istiadat pamaga’an bintang kapantangan om moginakan pogun do doungotuong.
“Suai ko ilo’, wookon ababayan suai kamapai no Pamaramaian Tadau Etnik Sabah, Pokikitanan om Galeri id Muzium Pogun om ogumu’ po om maan tokou pawarao’ id timpu toruhai, ababayan ngaawi’ nopo dilo’ nga’ id pososori’ Kota Kinabalu suai ko’ Ababayan ‘Jamuan Teh Tanak-anak’ i pohoroon id Watas Sandakan,” ka disio soira’ rinubaan media katalib pinopowonsoi kotombuluyan apantang kumaa di Tun Juhar id Istana Seri Kinabalu, di tadau Kaapat.
Isio po nogi’ Ponorikohon Puruankuasa’ Induk Pamaramaian dilo’ lumansan oinsanan ababayan di noulud koindalan poinsonong miampai sokodung bobos osonong mantad tongo’ koupisan om nogi’ kotinanan di poinggompit.
Nokotindapou nogi’ i Kumoduo Monguhup Montiri Pomuwalaian om Koporintaan Koiyonon, Datuk Mohamad Hamsan Awang Supain; Monunurat Pointatap KKTP, Datuk Jamili Nais; Luguan Potunud (Kotorinaan Ponguludan) Lintuhun Bandaraya Kota Kinabalu (DBKK), Rosnah Datu Tunai.
