Hajiji Haji Noor
KOTA KINABALU: China kakal sabaagi tambalut pidagangan oponsol Sabah soira’ ginumu’ dagangan dilo’ nokoposurat kinoinsawaton 1.2 pihatus kumaa RM6.56 bilion montok onom wulan kumolimpuunon toun diti.
“Mantad no do pisokodungan ikonomi om pidagangan pialatan Malaysia om China potilombus nokoburu’, kalansanan ku lobi kogumu’ pidagangan om kopoopuan China kumaa Sabah,” ka di Boyoon Montiri (KM), Datuk Seri Hajiji Haji Noor ontok pamaramaian Tadau Kabansaan Ko-74 Republik China i pinaharo doid Shangri-La Tanjung Aru, do hiti di kosodop.
Minoboros isio, China do noondo nopo nga’ tambalut pidagangan bobos agayo Malaysia, om Malaysia id nindikohon takawas tambalut dagangan Cina id Asia Tenggara.
“Ogumu’ i kiguno powonsoiyon montok monginggirot om popiulud karalano’ koburuon Sabah miampai China, popiamung naangayan koinwoguon Cina om angkab Malaysia Madani om Hontolon Sabah Maju Jaya (SMJ),” ka disio.
Teks boboroson disio binasa’ di Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam.
Dr. Joachim (gibang) minongobi’ di Boyoon Montiri, Datuk Seri Panglima Hajiji Haji Noor ruminamit tandamato mantad Konsul Tagayo Mogigiyon Republik China id Kota Kinabalu, Dr. Huang Shifang.
Karait do ponombuluyan, minoboros i Hajiji, kinorikotan mantad China nga’ nokoingkawas pointonod pinongukaban kawagu poinponu’ piwolitan China di tulan Kotolu toun diti.
“Montok onom wulan kumolimpuunon toun diti, tutumombului mantad China nokoposurat 17,040 (kinoingkawason 680.6 pihatus) nung piadangon di 2,188 ontok timpu miagal toun nakatalib.
“Sabah pinoromut miampai turu’ kakadayan agayo id China miampai 54 pontuludan tikid minggu om ginumu’ tindikohon soginumu’ 9,861. Kalansanan dahai kokito lobi kogumu’ pioputan tawan montok mongingkawas korikotan tutumombului mantad China kumaa Sabah.
“Ounsikou yahai sabab Sabah kakal sabaagi koiyonon i ihumon do tutumombului China, i potuu montok mihohombo toi mongindapu’. Koyuon mingkawas id koinsanai kinorikotan tutumombului kumaa Sabah, kiginumu’ 1,198,536 kinorikotan mantad tulan Koiso’ gisom Koonom touon diti nopo, nga’ ponokotanda’ osonong sabab iti nakapanahak resit ponombuluyan RM2.45 bilion montok Sabah. Iti nokopokito kinoingkawason 69.1 pihatus nung piadangon di timpu miagal toun nakatalib,” ka disio.
Hajiji minoboros, do timpu dumontol, Sabah lumansan lobi kogumu’ pisokodungan miampai China id kaganaan miagal do ginoris otomou, kapamansaian, pomutanaman tiknologi om koponuridongan kakadayan ‘pintar’, i wookon, montok mongunsub koundaran toinsanan om piilangan sopikalantoi swasta-porinta’.
