KOTA KINABALU: Kompleks Koupisan Kesenian om Koubasanan Negara (JKKN) silihon do Longkod ‘Kecemerlangan’ siktor kesenian om koubasanan tungkusan pogun.
Kumoduo Montiri Ponombuluyan, Seni om Koubasanan Malaysia (MOTAC), Khairul Firdaus Akbar Khan minoboros, monigampot dilo’, mogisuaian inggisaman maan poindalano’ montok papagaras om poposindak kompleks JKKN sumili songinan Longkod Kecemerlangan.
“Wookon inggisaman di pinoindalan nopo miampai popogompit lobi kogumu’ koisaan om kotinanan popoburu’ pomorunan nogi’ tongo’ kotinanan okon koporintaan (NGO) id tikid ababayan i poonjuron tooku miagal diti baino’ mooi do koilo om karati yolo’ do tingkananon kopio komontirian tokou.
“Miampai kogogonopan kakamot di korungod nogi’ mogisusuai kasasanangan i pinosodia’ id Kompleks JKKN, manahak tokou kosiwatan kumaa koinsanai popoburu’ pomorunan mantad tikid nayatan do ‘berkarya’.
“Suai ko ilo’, ponginsomokan id kinoiyonon kiguno inggumuan miagal momonsoi ababayan kumaa watas ngaawi’ montok mongintutun tongo’ bakat di haro montok poinggoyoon tokou id longkod kecemerlangan maya’ pigludaan om kurusus doid kaganaan seni om koubasanan,” ka disio ontok minoboros id Kinopoimaganan Ababayan Poposindak Seni Koubasanan Kompleks JKKN Sabah 2023 ‘Orang Kita Budaya Kita’ do hiti, di tadau Ko’onom.
Ababayan dilo’ i pinoindalan solinaid duo tadau minimpuun di tadau Ko’onom sinuangan do mogisusuai ababayan wookon nopo Senam Seni Zumba, pokikitanan kraft, Bazar Seni, Bingkil Kakamot Tuunion Sekafi, Open Mic Karaoke, kelas pangahakana seni sayau om teater, pokikitanan sinasawat om sayau koubasanan.
Nokotindapou nogi’ i Monunurat Bohogian Totuo (Koponguludan) MOTAC, Datuk Saharuddin Abu Sohot, Kumoduo Luguan Potunud Siktor Katatapan om Pamalanan JKKN, Mohd Amran Mohd Haris; Potunud Kopoburuan Bohogian Seni Koubasanan JKKN, Ronan Abdul Rahman om i Potunud JKKN Sabah, Jasmi Rasit.
