Hajiji Haji Noor
TAWAU: Koporintaan Pogun pinopoobi’ soginumu’ RM15 riong montok monokodung, papagaras om popoinggirot po do Ababayan Ponguhupan Pomorunan Okoro’ om Gonsuhatan (IKS) id Sabah, ka di Boyoon Montiri, Datuk Seri Hajiji Haji Noor.
Suai ko ilo’, ka disio, soginumu’ RM6.17 riong pinoobi’ kumaa Koupisan Koburuon om Ponolidikan montok popoinggumu’ kopointutunan asil nimbulayan (produk) Sabah kumaa pidagangan suang om sompomogunan.
Tumanud disio, Ababayan Skim Pensijilan Takanon Oumoligan Tonggungan Pomorunan (MeSTI) om Halal pinointutunan otun diti montok papasaga’ produk IKS Sabah koponikotopong id nayatan sompomogunan.
“Soginumu’ RM7.1 riong pinoikid nogi’ kumaa Kotinanan Kopoburuan Ikonomi Sabah (SEDCO) montok monilombus inggisaman poposodia’ om momonsoi premis pongindopuan, tongo’ kadai sosio-ikonomi om susuai ababayan kousahawanan toun diti.
“Kohondot dilo’ mimang oku di mongungusaha’ monongkiahou kosiwatan i pinosodia’ koporintaan, kaampai no tumilombus mongingkawas toilaan om komilaan mooi do produk diolo’ kaanu tumopong gisom id nayatan sompomogunan,” ka diiso id Ababayan Kinopoimaganan Karnival Kousahawanan om Kerjaya (SABAHFEC) 2023 Zon Tisan Kosilahon id Kounsol Kakadayan Tawau id konihab. Teks boboroson disio binasa’ di Monguhup Montiri kumaa Boyoon Montiri, Datuk Haji Nizam Abu Bakar Titingan.
Karnival dilo’ pinaanjur do Exco Koonduan Biro Kousahawanan Koonduan Parti Gagasan Rakyat Sabah miampai sokodung Koisaan Double A Martian Arts Tawau.
Hajiji minoboros, koporintaan nga’ pointopot nogi’ monguhup tinimungan mongungusaha’ id pogun diti mooi do kotilombus mumang buru’ om monginggirot pongindopuan diolo’.
“Mantad dilo’ kopotundaan Pomorunan Okoro’ om Gonsuhatan (PKS) tilombuson onuan koposuulan sabaagi pomorunan monokodung om posunduran kumaa siktor kapamansaian. Kogompitan mogisusuai bohogian kaampai Yayasan Sabah om komponi swasta miagal PETRONAS id kopoburuan IKS ogumu’ nokouhup komponi swasta id pogun diti,” ka disio.
Tumanud disio, koporintaan pogun nokopoindalan mogisusuai inggisaman montok popoburu’ ikonomi pogun om rayat maya’ palan kopoburuan Hontolon Sabah Maju Jaya (SMJ) kosuul no katalib pandemik Covid-19.
Ka disio, kinopoonjuran SabahFEC 2023 kouhup tinimungan mogigihum karaja’ do maganu kosiwatan pakarajaan om komilaan, suai ko’ ponguhupan kousinan montok mongungusaha’ mantad mogisuaian kotinanan koporintaan di poinggompit.
Otumbayaan isio, karnival dilo’ nopo nga’ impohon bobos osonong montok mogigihum karaja’ om mongungusaha’ papagaras ikonomi sondiri, kaanu kointalangan ponguhupan geran kousinan mantad kotinanan di poinggompit, koponguludan kousinan suai ko’ kosiwatan karaja’ om komilaan.
Kohodot dilo’, unsubon di Hajiji o tikid mogigihum karaja’ lolobi no sukod wagu momoguno kopio tikid kogogonopan, ababayan om kosiwatan mogigihum pakarajaan nogi’ kosiwatan pakarajaan pinosodia’ koporintaan.
“Mogigihum karaja’ kiguno momoguno poinponu’ portal pakarajaan Sabah Jobs Portal (SJP) om MyFutureJobs montok popiromut diolo’ id touki montok mongilag kogompit di sindikit kopongudutan pakarajaan.
“Laang diti kapasaga’ diolo’ do osoding di tongo’ kosiwatan karaja’ om surupukaraja’ pakarajaan suai i pouyuhon. Portal SJP diti kosuul montok rayat sabah om kokusungan karaja’ di poilaan nopo nga’ kosiwatan karaja’ mantad poliliput Malaysia,” ka disio.
Mimang nogi’ isio ddo SABAHFEC 2023 poongoyon kumaa zon ngaawi’ suai id pogun diti, mooi lobi kogumu’ rayat Sabah kaanu koundaran.
