Mohd. Nazri (kotolu, wanan) miampai di Dr. Jeffrey id ababayan pinomupusan Tadau Momukabun, Momutayam om Monginsada’ nayatan Sabah 2023 id Wisma Pertanian, Kota Kinabalu di tadau baino’.
KOTA KINABALU: Kotinanan Momukabun Pogun Sabah (PPNS) mamaramit osonong atag om katatapan Koporintaan Pogun montok monuridong kawagu Lembaga Padi Sabah (LPS) montok popoburu’ pomorunan parai om wagas pogun diti.
Ponorikohon dilo’, Datuk Mohd. Nazri Abdullah minoboros, PPNS monokodung atag dilo’ sabba ilo’ nopo kapanahak koundaran kumaa mogigiyon om pogun Sabah.
Ka disio, norikot nodi timpu do Sabah pasanganu Kotinanan Parai sondiri miagal di nokoumbal noturidong di maso koporintaan pogun nokopogulu montok mongulud pomorunan parai pogun diti.
“Agayo kotumbayaan tokou miampai haro Lembaga Padi Sabah kouhup do Sabah mamagampot rikoton rontob kosukupan tinan (SSL) wagas gisom 60 pihatus dumontol toun 2030 miagal di kiniikiro do Koporintaan Pogun nung piadangon di id rontob no do 22 pihatus noondo diti.
“Mantad koingkawason SSL wagas Sabah, kouhup ilo’ mongingkuri’ ginumu’ udaron wagas mantad pogun labus miagal Vietnam, Thailand, Pakistan om susuai.
“Iti do potilombus kopongingkuri’ koluyungon lumabus mato tusin Malaysia, i kopountung pogun om pomogunon,” ka disio kumaa media katalib tuminindapou Ababayan Pomupusan Pamaramaian Tadau Momukabun, Momutayam om Monginsada’ (HPPNS) id linimput Wisma Pertanian Sabah do hiti di baino’.
Mohd. Nazri minongomi kointalangan di Boyoon Montiri, Datuk Seri Hajiji Haji Noor di tadau Kaapat do Koporintaan Sabah maya’ Komontirian Pomutanaman, Ponginsadaan om Pomorunan Takanon (MAFFI) do noondo id karaja’ koponuridongan kawagu LPS.
Ka disio, laang dilo’ pikikiro kopongingkawas rontob SSL wagas Sabah kumaa 60 pihatus dumontol 2030.
Do noondo, SSL wagas Sabah id rontob 22 pihatus naamot 78 pihatus kogugunoon wagas pogun diti tombungon maya’ wagas nudar.
Mohd. Nazri otumbayaan mantad haro o LPS, inggisaman om moningkanan montok ponuridongan ginaras pomorunan parai nokoiyonon monotk papalabus asil wagas Sabah aanu monigampot.
“Sabah pasanganu ginaras id kopolobusan parai om wagas nokoiyonon kaampai no asil pomutanaman om taakanon suai montok mongingkawas kopoundaran babarang pomutanaman nokoiyonon,” ka disio pinoposotol.
Minamarayou nogi’ isio inggisaman Koporintaan minonuridong iso’ puruankuasa’ pinotomod kabinet monotk monoibau hal SSL id pogun diti buruanon do MAFFI.
Mohd. Nazri minoboros, kopogiuhupan ginaras om inggisaman kapaampai koupisan om kotinanan koporintaan pogun om Pisompuruan nogi’ siktor swasta kouhup mongingkaws SSL kopolobusan koinsanai ponit taakanon id pogun diti.
Tumanud disio, puru ngaawi’ momukabun id Sabah poinsodia’ manahak sokodung, ponguhupan om kogompitan mitilombus monguhup inggisaman koporintaan dilo’.
“Ogumu’ puru momukabun popoburu’ pananaman parai lolobi no id watas Kota belud, Kota Marudu, Papar, Keningau om susuai po. Yolo’ nokopouhup miampai atalang id kopolobusan parai om wagas nokoiyonon Sabah,” ka di Mohd. Nazri.
Kalansanan nogi’ disio lobi kogumu’ manganapu’ labus i papaapu’ id siktor pomutanaman, ponginsadaan om pomutayaman i kiharo kosiwatan di agayo kopio montok tilombuson popoburu’ id Sabah.
Kumoduo Boyoon Montiri I po nogi’ Montiri Pomutanaman, Ponginsadaan om Pomorunan Takanon, Datuk Seri Dr. Jeffrey Kitingan pinopoimagon pinomupusan karamaian HPPNS 2023 dilo’.
