Dr. Jeffrey Kitingan
KOTA KINABALU: Kumoduo Boyoon Montiri, Datuk Seri Dr. Jeffrey Kitingan minanahak kopoingatan kooturan kositum kaawagu diti, i manapad ginumu’ bir aiso’ sukai i owiton lumabus do tutumombului mantad pulou dilo’, kopongumpadan ikonomi Labuan.
“Koyuon aiso’ sukai Labuan nopo nga’ posunduran oponsol ponombuluyan om pidadangan nokoiyonon. Kosimbanon kooturan di monigowo, miagal poporontob tutumombului kumaa apat no tin bir (aiso’ sukai), kikosiwatan do kopongumpadan ikonomi pulou dilo’.
“Sundung pia tonggungan Koporintaan Pisompuruan nopo nga’ montok manamong om popoburu’ ikonomi Labuan, sabaagi kukumaraja’ koporintaan, kitonggungan tokou montok popolombus kotongoban tokou kumaa kopikikiraan kosilapan toi kosiwatan montok koponginsonongan.
“Id Parlimen, noowit ku haal ngaawi’ diti, popoburu’ kopoindalanan momonsoi kooturon ikonomi i aadas om poinsuul i maganu kokiraan koyuon di poinsuai tikid watas,” ka disio id iso’ kointalangan di tadau baino’.
Minokianu isio Koporintaan Pisompuruan papaharo pibarasan poingukab om pointulid miampai mogigiyon Labuan, mogintong kawagu laang ngaawi’ di kaawagu diti, om manahak kointalangan wagu kokomoi kinoburuon jambatan i pinaatag dilo’.
Dr. Jeffrey po nogi’ Presiden Parti Solidariti Tanah Airku (STAR), mongiikiro laang osikap mantad Perbadanan Labuan, id siriba’ buruanon di Tan Sri Anifah Aman, monotk monoibau kaantaban diti om mangahak Labuan kumaa ponondulian ikonomi.
“Sabaagi mobi’ rayat, mositi’ tokou mongunsub koburuon om kotundunan montok oinsanan mogigiyon Malaysia, kaampai mogigiyon Labuan. Poungkakat oku miampai diolo’ id kopinggisaman karalano’ ikonomi i kiwaya’ om po’ompus i mamantang ‘status’ poinpoopori diolo’.
“Sundung pia do Labuan nopo nga’ Watas Pisompuruan om aiso’ mongongobi’ doid Lintuhun Undangan Pogun (DUN) Sabah, susuyan laid piilangan tokou om kinoroniton ‘geografi’ koposotol koponsolon hal diti montok dati’ id Sabah,” ka disio.
Daamot dilo’, Dr. Jeffery minongunsub Koporintaan Pisompuruan do popoilang kointalangan kaawagu kokomoi atag projik jambatan i koporomut tana’ agayo Sabah om Labuan.
“Sundung pia do hal diti id labus kaganaan kuasa’ Koporintaan Sabah, ilo’ nopo nga’ pogibabarasan ginumuan di agayo, i asaru’ osili roiton ontok timpu pomilian agayo. Jamabtan kaanu kosili projik kogogonopan ‘instrumental’ i kopoinggirot kopioputan Labuan om kopogisusuaian ikonomi,” ka disio.
