Tun Juhar pinapatahak setifikit pongunsikohan kuminaa di Luguan Upisor Eksekutif Sedia, Datuk Hashim Paijan (kotolu, wanan) om poingintong i Hajiji (koduo, gibang) om Montiri Intodonon Tulun V Sivakumar (koduo, wanan).
KOTA KINABALU: Pisokodungan id pialatan Koporintaan Pogun om Pisompuruan mositi’ do kotolibamban di inggisaman ‘modal insan’ kapaampai ababayan kopoburuan sosioikonomi suai montok koundaran rayat Sabah om Sarawak, ka di Boyoon Montiri (KM), Datuk Seri Hajiji Haji Noor.
“Montok Sabah, iti opongol sabab minggisom yahai do monuridong mogigiyon di ‘inklusif’ om oulud mimpau di palan rikoton kopoburuan dahai, Rikoton Sabah Maju Jaya, hinombo do poposotol yahai koponsolon modal insan om poposuang dilo’ sabaagi iso’ inggisaman agayo dahai.
“Pointopot yahai do monuridong ginaras om komilaan maya’ mogisusuai inggisaman i nokoindalan dahai. Ingkaa nogi’, ilo’ nga’ mimpau di ‘prinsip’ Madani ilo’ nopo nga’ Kotilombuson, Komogoton, Inovasi, Mamantang, Otiu’, Opusou om Obinlisi,” ka disio id ababayan makan doungotuong kopongunsikohan Pitimungan om Pokikitanan Modal Insan Kebangsaan (NHCCE) 2023 – Watas Borneo id Longkod Konvensyen Sompomogunan Sabah (SICC), do hiti di songkosodop.
Ababayan dilo’ pinoimagon di Molohingon Pogun, Tun Juhar Mahiruddin.
Hajiji minoboros, ababayan makan doungotuong diti i pinaanjur kopihondot NHCCE 2023 – Watas Borneo, kopokito pisokodungan id pialatan tongo’ popoburu’ pomorunan Sabah om ‘Human Resource Development (HRD) Corp’ ontok diolo’ miuhup montok papabantug modal insan Malaysia kumaa nayatan pomogunan.
“Ilo’ po nogi’ kointalangan pisokodungan id pialatan koporintaan i kiwaya’ om kosudong id pialatan Koporintaan Pogun om Koporintaan Pisompuruan. Otumbayaan oku inggisaman miagal diti amu’ apatut opupusan id pitimungan diti nopo. Mositi’ tokou tumilombus monginggirot piilangan miagal diti om popoburu’ inggisaman kosudong montok mongingkawas ginoris karaja’ tokou om inggisaman kopoburuan bakat,” ka disio.
Hinulit nogi’ di Hajiji do pitimungan dilo’ nopo nga’ posunduran bobos osonong montok oinsanan tutumanud i poinggompit mantad Sabah om Sarawak miboros di kaantaban om kosiwatan modal insan diolo’ miampai kirati.
“Gunoon kosiwatan diti montok minsingilo mantad abaal nogi’ karait di karalano’ momoguno panalasaian ‘inovatif’, monimung pomusarahan posiahon kointalangan om momoguno ponorisidan montok momonsoi kootuson di kiwaya’,” ka disio.
