Hajiji miampai nuludan kabinet pogun om naalap suai guminambar miampai Puru surupukaraja’ Koporintaan i nokotindapou id Ababayan Amanat Boyoon Montiri kumaa Pakakaraja’ Koporintaan id Pogun Sabah om Kopoimpuunan SMJ 2.0.
KOTA KINABALU: Boyoon Montiri, Datuk Seri Haji Hajiji Haji Noor pinoposotol koburuon modal insan, kasasanangan rayat, infrastruktur om kopomogompian tomou sabaagi tingkananon tagayo SMJ 2.0.
Minoboros isio, koburuon modal insan onuan koposuulan miampai kopoobian RM164.01 riong, kaampai kaparaladan sikulasip om ponguhupan balajaran, TVET, STEM, om pintoriningan pomutanaman nogi’ komilaan komilaan winonsoi (AI).
Ka disio, SMj 2.0 nga’ monilombus nogi’ ponguhupan balajaran, kaampai 14 point ponguhupan balajaran kigatang RM203.4 riong om Sikulasip Koporintaan Pogun Sabah (BKNS) nokoingkawas mantad RM55 riong di 2021 kuminaa RM145 riong di 2025.
Ka disio, soginumu’ 480,000 susumikul nakaramit koundaran ponguhupan balajaran Koporintaan, kaampai kopongokunan Setifikit Poporisaan Bersatu (UEC) montok kopongupalaian sikulasip om kosuangon surupukaraja’ Koporintaan.
“Ababayan Rumah Mesra SMJ nga’ naramit di soginumu’ 7,482 mamaramit om tilombuson miampai 50 unit tikid Koiyonon DUN toun diti, kosuul no montok tinimungan mosikin, mosikin ‘tegar’ om mikoruhang i kopisasawo.
“Ababayan Sentuhan Kasih Rakyat (SYUKUR) pinaralad mantad 100,000 kuminaa 140,000 kmamaramit miampai kinopoobian soginumu’ RM339.16 riong toun diti, kopiongoi di ponguhupan Koporintaan Pisompuruan miagal Sumbangan Asas Rahmah,” ka disio id Ramai Amanat Boyoon Montiri kumaa Pakakaraja’ Koporintaan Pogun Sabah om Kinopoimpuunan SMJ 2.0 id Longkod Konvensyen Sompomogunan (SICC), do hiti di tadau baino.
ka di Hajiji, id siriba’ tingkananon infrastruktur om Kopomogompian Otomou, soginumu’ RM6.8 bilion pinoobi’ id siriba’ RMK13 montok koburuon infrastruktur, utiliti om ginoris lestari, kaampai projik ‘strategik’ miagal Ralan Agayo Pan Borneo, pamansaian om monginsonong loji pongusapan wait, ponginggirotan grid lotirik om projik OTEC, hidroelektrik nogi’ kopongimbulaian ginoris obulou.
ka disio, Koporintaan nga’ popoinggayo nogi’ infrastruktur digital maya’ Longkod e-Desa, VSAT om Starlink, kopiongoi di ababayan koporintaan digital mimpau AI.
Id sunduk kopomogompian tintomou, ka disio, soginumu’ RM672.05 riong pinoobi’ montok pongumoligan biodiversity, ponondulian gompi’ sandad posorili’ om koponimbabaan kosimbanon iklim, miampai rikoton 30% Watas Pongumoligan Poinponu’ dilo’ (TPA) dumontol 2030.
Ka disio, Ikonomi Obulou sinimbuat sabaagi posiau strategic SMJ2.0 kopuli koburuon bioteknologi Marin, Ponginsadaan pintar, marikultur wagu, logistik om ponombuluyan lestari, nogi’ kopomogunaan osonong baang sabaagi posunduran ikonomi labus kakadayan.
Minoboros i Hajiji, Koporintaan ppinopointutun Blue Financing maya’ memorandum Pihunungan (MoU) miampai Maybank montok koposolimbahan Sukuk Obulou kigatang RM1 bilion, miampai kinogumu’ ponimpuunan RM300 riong, montok papasanang tongo’ komponi poinhompit, kaanu kasasanangan kousinan.
Hajiji pinoposotol kalantaion SMJ 2.0 mimpau kumaa pakakaraja’ Koporintaan sabaagi posunduran oponsol kopoindalanan katatapan. Kopulokison, tinonggungan om disiplin kapatantu’ songkuro sinodu’ osigampot kopoburuon kumaa asil i opurimanan rayat.
Pinosotol nogi’ disio do Koporintaan pogun amu gumuli’ kumaa ponginsomokan laid, tu’ kootusan di onuon nopo nga’ montok koponsolon timpu anaru Sabah sundung pia do okon ko’ toririmo kororohian.
“Kalantaion SMJ 2.0 nopo nga’ tonggungan toinsanan, papatantu’ kosiwatan pakarajaan koimbulai, kopoopuan strategik kotilombus om nindopuan pogun otorina’ miampai opulokis, oniting om kitonggungan kumaa rayat noondo om sinakagon do obontol,” ka disio.
