KOTA KINABALU: Suruhanjaya Pomilian Agayo Malaysia (SPR) di tadau baino’ pinahabar Pomilian Agayo Okoro’ (PRK) Parlimen P.187 Kinabatangan om Lintuhun Undangan Pogun (DUN) N.58 Lamag, Sabah pohoroon do tulan Koiso’ 2026 nosusuhut kinokusungan tindikohon mantad kinoiduan pogun di mongingigit dilo’, Allahyarham Datuk Seri Bung Moktar Radin.
Tadau Pomungaranan Calon pinapatantu’ do ko 10tw Koiso’ 2026 (tadau Koonom), pongundian osopung do ko 20tw Koiso’ (tadau Koduo), om tadau mongundi’ kopio nopo nga’ ko 24tw Koiso’ 2026 (tadau Koonom). Timpu bokimpin pinotomod kapanau solinaid 14 tadau mipuun soira’ kopoimaganan calon gisom jaam ko 11.59 totuong do ko 23tw Koiso’ 2026.
Ponorikohon SPR, Dato’ Sri Ramlan Harun minoboros, kokusungan goduduo tindikohon dilo’ pinoilo miampai poinbida’ di Molohingon Dewan Rayat, Tan Sri Dato’ Dr. Johari Abdul di ko 8tw Kohopod om Duo 2025, om Speaker DUN Sabah, Datuk Seri Kadzim M. Yahya di ko 9tw Kohopod om Duo 2025.
“Kohondot dilo’, SPR pinapaharo Mitingan Pinotomod di ko 16tw Kohopod om Duo 2025 om pinapatantu’ tadau-tadau oponsol montok PRK Kinabatangan om Lamag,” ka di Ramlan id kointalangan media SPR di baino’.
SPR nga’ mongukab upalai montok oinsanan ‘kategori’ undi pos, kaampai pakakaraja’ pomilian agayo, puru PDRM om ATM, pakakaraja’ media, nogi’ mamasok Malaysia i poingiyon id sompogunan, mimpuun ko 16tw Kohopod om Duo 2025.
Tadau pomupusan pongupalaian misuai tumanud kategori, wookon dilo’ 6tw Koiso’ om 8tw Koiso’ 2026.
Oinsanan mongungupalai undi pos poindalanon maya’ piromutan (talian) maya’ Portal SPR id www.spr.gov.my, naamot ponudukan ogonop nga’ posodiaon montok papasanang mongungundi’ popoindalan kopotutan diolo’.
Montok tuduan koturunduson PRK, SPR poposili songulun Upisor Mongungulud Pomilian Agayo uhupan di walu’ Monguhup Upisor Mongungulud. Apat Tinimungan Pogirot Kuasa Kimpin Pomilian Agayo (PP-KPR) nga’ turidongon, kopohompit mongobi’ PDRM, bohogian kikuasa’ nokoiyonon, om mobi’ calun monokitanding.
Longkod Pangaranan Calon (PPC) id Longkod Kopongintoban Pinotomod Undi (PPRU) montok goduduo PRK momoguno Lintuhun Sri Lamag, Kinabatangan. SPR kipalan poposili 1,106 kukumaraja’ montok popoindalan PRK id 36 longkod mongundi koubasanan miampai 117 waya’an om iso’ longkod pongundian osopung.
Kos koinsanai PRK pikikiro RM10 riong naamot rojistor momimili’ bobos wagu gunoon kopohompit 48,722, kaampai 196 puru pulis. Rojistor Momimili’ Pomilian Agayo (DPPR) pinatantu’ kotimpuun padagangon do ko 5tw Koiso’ 2026.
Mongungundi’ kaanu mogintong longkod om waya’an mongundi sompoopori mimpuun ko 5tw Koiso’ 2026 maya’ portal MySPR Semak toi momoromut hotline SPR id 03-88927018. SPR mongunsub nogi’ calon monuang foom pomungaranan om momonsoi pambayaran deposit lobi kosopung montok papatantu’ kopoindalanan pomungaranan koindalan oturundus.
SPR nga’ popouyu nogi’ kosiwatan kumaa kotinanan koporintaan, NGO, om tinan suai montok sumili mio’ontong pomilian agayo montok mogintong koinsanai kopoindalanan mimpuun tadau pomungaranan calon gisom kapahabaran kootusan pinotomod.
Tadau pomupusan pongupalaian mio’ontong nopo ko 31tw Kohopod om Duo 2025.
Suai dilo’, SPR poposolimbou kopoindalanan pomilian agayo miampai mitilombus maya’ live streaming id laman media sosial SPR montok pipiro longkod om waya’an mongungundi’ nopili’.
Montok mongingkawas kogompitan mongungundi’, SPR popoindalan kimpin ‘Jom Kita Undi’ momoguno media elektronik, media sosial, ‘siar raya’, om kapadakatan binidang id koiyonon kosudong nogi’ iyonon rubpuon ginumuan.
Ramlan pinoposotol laang ngaawi’ diti onuon montok papatantu’ PRK Kinabatangan om Lamag kapanau oturundus, oniting om manahak kosiwatan kumaa koinsanai bohogian, kaampai mongungundi pos om mio’ontong pomilian agayo.
SPR mokianu koinsanai mongungundi popoindalan tonggungan diolo’ do tadau mongundi’ nogi’ mananud koinsanai karalano’ di pinatatap montok koturunduson om tinonggungan pomilian agayo.
