Hajiji miampai di Joniston, lansanon om mononokodung GRS pinapalahat pangkis sunduan GRS.
KIULU: Koporintaan pogun i buruanon Gabungan Rakyat Sabah (GRS) sabaagi parti agayo papatantu’ do kaadangon pulitik id Sabah,” ka di Boyoon Montiri om Ponorikohon GRS, Datuk Seri Haji Hajiji Haji Noor.
Minoboros isio, do maya’ no do kaadangon pulitik om piuhupan miampai koporintaan Pisompuruan, koporintaan pogun koowit lobi kogumu’ koburuon om kopoindalanan palan dau montok monuridong Sabah di otunda’.
Ka disio, oponsol montok rayat do tumilombus monokodung GRS “tu’ manamong tokou do pomogunan tokou sondiri’.”
“Momoguno tokou sokodung rayat om GRS mositi’ pogulion sabaagi koporintaan id pomilian agayo diti montok papatantu’ kaadangon pulitik id Sabah,” ka disio id ababayan miampai rayat doid Lintuhun Poingukab Kiulu di tadau baino’.
Hajiji i po nogi’ calon GRS montok Sulaman minagada’ totondos pembangkang do koporintaan Pisompuruan minaganu koinsanai mantad Sabah.
“Sabaagi songinan pomogunon, mositi’ tokou nogi’d o kiharo piuhupan di agaras miampai Pisompuruan. Nga’ ilo’ okon ko’ kirati do monokiboboyo’ tokou diolo’.
“Id tikid pirubaan, toririmo ku okodou om kiningkakaton ogirot id kopomususan ponugatan kopotutan ngaawi’ Sabah,” ka disio.
“Osili iso’ koimamangon montok pogun nung GRS amu’ kaanu monilombus palan koburuon Sondikoton Sabah Maju Jaya,” ka disio.
Minongomi totondos do koporintaan pogun buruanon GRS amu’ nakalantoi, ka di Hajiji, koyuon nopo dilo’ nga’ id sambalik.
“Pembangkang nakaanu no suminili koporintaan pogun solinaid lobi duo no toun. Iti kirati do yolo’ no i amu’ nakalantoi,” ka disio.
Minoboros isio, pembangkang noowi’an pomusarahan, noponu’ do pagkakaa om mongulingad nopo di kobolingkahangan aiso’ suang.
Hajiji otumbayaan nogi’ do calon GRS montok Kiulu, Datuk Joniston Bangkuai pogulion sabaagi Puru Lintuhun Undangan Pogun nosusuhut di surupukaraja’ disio kumaa tongo’ mongungundi’ id kinoiyonon dilo’.
“Miampai do apat po tadau pogulu pomilian agayo, pokionuon ku rayat momonsoi sumpili’ di kohunung om papatantu’ koinsanai kalantaion di nosigampot tokou aanu monilombus id suang timpu limo po toun dumontol,” ka disio.
