Dr. Joachim (poindikau) guminambar pongingitanan miampai tombului naalap i nokotindapou id ramai dilo’.
RANAU: Kumoduo Boyoon Montiri II, Datuk Dr. Joachim Gunsalam minongomi kinoponuridongan Upis Wagu Kounsol Watas Ranau sabaagi laang di kohunung montok papatantu’ watas diti kotilombus kotunda’ kopiongoi di kogugunoon maso-maso.
Isio i po nogi’ Montiri Koporintaan Koiyonon om Pomuwalaian minoboros, ponuridongan upis di lobi koposimbayan oponsol kopio montok manampung kinoinggumuon mogigiyon, suai ko’ papaantu’ pitorinaan kopoindalanan kapanau miampai lobi koturundus om oulud.
“Pinonuridongan linimput Kounsol Watas idti i nokotimpuun di turu’ toun nakatalib om noondo nopongo poinponu’.
“Kohondot dilo’, pinonuridongan upis wagu diti nopo nga’ laang id kohunung montok papatantu’ Ranau kotilombus komogot kopiongoi di kogugunoon maso-maso,” ka disio ontok pinopoimagon linimput wagu dilo’ do hiti di tadau baino’.
Dr. Joachim (kaapat, gibang) guminambar miampai do tombului naalap i nokotindapou id ramai dilo’.
Dr. Joachim minoboros, kogogonopan dilo’ koponginggirot ginoris sitaf Kounsol Watas Ranau id koponguludan haal ngaawi’ mogigiyon kaampai koburuon infrastruktur, koponginsonongan kogogonopan ginumuan, ponguludan asil om kopoindalanan kaparagatan komuniti.
Minoboros isio, upis wagu dilo’ nga’ kosili kokitanan angkab koporintaan pogun id inggisaman mongingkawas waya’ kapatahakan surupukaraja’ koporintaan id nayatan watas.
“Otumbayaan oku mantad haro kogogonopan diti, puru karaja’ Kounsol Watas Ranau kopoindalan tonggungan id koyuon di lobi osimbayan, kihasil om abaal,” ka di ADUN Kundasang dilo’ do pinopointalang.
Ka disio, upis wagu dilo’ okon nopo ko’ kosili longkod mongulud pitorinaan pinotomod, nga nogi’ kikogunaan sabaagi suuskuon mogigiyon om kokitanan kotumbayaan rayat kumaa koporintaan pogun.
Dr. Joachim suminain id plak linimput wagu Kounsol Watas Ranau sinasi’ dilo’ suai.
Dr. Joachim pinoposotol, tikid upisor om sitaf Kounsol Watas Ranau kiguno momoguno kogogonopan wagu dilo’ do poinponu’ miamapi mongingkawas rontob kopulokison, tinonggungan om manahak surupukaraja’ di osuau rayat.
“Upis diti winonsoi montok rayat, om rayat no i apatut karamit koundaran bobos agayo mantad dilo’,” ka disio pinoposotol.
Pinointalang nogi’ disio do kalantaion sosonginan kotinanan amu’ tumalahan kumaa linimput nopo, nga’ kumaa sunduan, tinonggungan om kopoindalanan puru karaja’ i popoindalan tonggungan id suang dilo’.
“Linimput diti ponimpuunan nopo, kalantaion dilo’ tumanud do poingkuro ilo’ do gunoon montok manahak surupukaraja’ bobos osonong kumaa mogigiyon,” ka disio.
Ka disio, koburuon Ranau kopiongoi di ababayan Sondikoton Sabah Maju Jaya (SMJ) om toririmo onuan kopomodulianan do koporintaan pogun mooi do watas dilo’ amu’ oiduanan id sunduk kosusukupan, kogogonopan ginumuan, kosiwatan ikonomi om kasasanangan rayat.
Ka disio, Ranau okon nopo ko’ nointutunan sabaagi rikoton ponombuluyan agayo, nga nuru’ mimbulai sabaagi songinan watas di otunda’ om kopounsikou id koinsanai sunduk koposion mogigiyon.
Dr. Joachim (kotolu, gibang) minooi intong upis id linimput wagu dilo’.
Daamot dilo’, minonongkounsikou isio kumaa oinsanan bohogian i nakaampai pinapalantoi pinonuridongan upis wagu dilo’ kaampai no kuntiriktor, momorunding, nuludan sitaf Kounsol Watas Ranau nogi’ bohogian suai i nokopouhup ginoris om sokodung.
“Nung aiso’ kinouhupan oinsanan bohogian, projik diti amu’ doti’ naanu minonumboyo’. Kalansanan ku sunduan diti kotilombus montok papalantoi lobi po kogumu’ projik koburuon id Ranau do timpu dumontol,” ka disio.
Nokotindapou nogi’ Puru Parlimen Ranau, Datuk Jonathan Yasin; mobi’ Montiri Kousinan po nogi’ ADUN Karanaan, Datuk Seri Masidi Manjun i Datuk Faimin Kamin; mobi’ Monguhup Montiri kumaa Boyoon Montiri po nogi’ ADUN Paginatan, i Juis Konsuling; Monunurat Pointatap Komontirian, Datuk Dr. Jamili Nais; Upisor Watas Ranau po nogi’ Ponorikohon Kounsol Watas Rana, Tinus Manggam; Upisor Eksekutif, Elmer Endra M. Sator; Luguan Watas, OKK Muhasip Ruman om i Dominic Ghanie.
