Mujahid (tanga’) guminambar miampai popinwara’ poingkaraja’ i Khairil Fitri Abdul Karim (koduo, wanan).
KOTA KINABALU: Siam kaparagatan osuul mogindad tulun ginumuan kopihondot Karnival kita Madani Nayatan Pogun Sabah 2025 mimpuun ko 21 gisom 23tw Kowalu’ id Padang Istiadat, Tuaran.
Monguhup Potunud Bohogian Surupukaraja’ Piromutan om Koburuon Mogigiyon (PKPM), Koupisan Kopointalangan (JaPen) Sabah, Mujahid Halpi minoboros karnival dilo’ kituduan monginggirot sunduan pisompuruan mogigiyon mogisuai tinaru suai ko’ koiyonon poporikot katatapan om inggisaman koporintaan mimpau konsep Malaysia Madani.
“Wookon kaparagatan agayo nopo Digital Race Merdeka @Kelab Malaysiaku, Sukan Aktif @Madani, Jualan FAMA @Agro Madani, pialaan Bintang Patriotik @Madani, reruai (sinusulap) surupukaraja’ kotinanan koporintaan, Fan Art @Madani, nogi’ Kapadagangan Rahmah om ogumu’ po suai.
“Suai dilo’, pohoroon nogi’ o Ababayan Ukhuwah Madani i pohimogonon di Puru Lintuhun Undangan Pogun (ADUN) Pantai Dalit, Datuk Jasnih Daya do ko 21tw Kowalu’ diti,” ka disio kumaa media katalib pinirurumaan miampai Radio UMSfm id Univositi Malaysia Sabah, di tadau Koduo.
Ka disio, pialaan Bintang Patriotik @Madani kopokito 30 piboi osopung monongkiala’ suminding sinding patriotik miampai tolu i bobos osonong pilion kumaa panantaban tohuri.
Suai ko’ momolihis, tulun ginumuan nga’ kikosiwatan nogi’ maganu babarang kogugunaan id gatang poinpatut maya’ Pidagangan Rahmah do ko 23tw Kowalu’, 22tw Kowalu’ Pidagangan Agro @Madani i owiton do FAMA nogi’ mooi intong di sinusulap kotinanan kopoirntaanm ontok maganu kointalangan om surupukaraja’ miampai mitilombus.
“Ababayan diti poingukab kumaa oinsanan rayat Malaysia amu’ monutun umur om nantadon. Aiso’ bayaran poontokon om tulun ginumuan nuru’ no do rumikot id kinoiyonon montok umampai mogisusuai kaparagatan di pinosodia’,” ka disio pinopointalang.
Mujahid minoboros, montok ababayan atantu’ miagal Bintang Patriotik, koporojistoran aanu momonsoi id kinoiyonon toi maya’ foom i poilangan id media sosiol pinotomod JaPen Sabah.
Kalansanan disio kopongonjuran Karnival Kita MADANI 2025 kopongimbulai mogigiyon osompuru nogi’ koposuni pogititimbangan, potipapantangan om piuhupan sompipi’ rayat.
Kointalangan potilombus karait timpu noulud do ababayan om kapahabaran kaawagu aanu maya’ laman sosial pinotomod JaPen Sabah kaampai Facebook om Instagram.
