Hajiji, Shahelmey om Awang Ahmad Sah miampai tongo’ tombului id Lintuhun Sri Putatan.
PUTATANl: Boyoon Montiri, Datuk Seri Haji Hajiji Haji Noor minoboros, koporintaan pogun amu’ sumunsuri id tonggungan dau montok tumilombus manamong koundaran sukod wagu id Sabah.
“Kohondot dilo’, koburuon komulakan pinosuang sabaagi iso’ tukod koburuon pogun id Sondikoton Sabah Maju Jaya (SMJ).
“Komulakan okon ko’ mamamaramit nopo do koundaran, nga nogi’ ejen kosimbanon. Id pomogunan di noponu’ kaantaban, sukod wagu mositi’ sumili momuruan piuludan mogigiyon, manamong tungkusan koubasanan nogi’ mononokodung komogoton tiknologi,” ka disio.
Pinoboros disio ilo’ ontok minanahak boboroson id Ababayan ‘Anak Muda’ doid Lintuhun Sri Putatan, do hiti baino’.
Boyoon Montiri pinoposotol, koporintaan pogun minamalan mogisusuai inggisaman montok sukod wagu.
“Mositi’ tokou mamarati gugunoon diolo’ om tumilombus tokou mongulud palan montok komulakan.
“Pointonod toun 2021 gisom 2025, soginumu’ 14 inggisaman wagu pinointutunan kopohompit kinopoobian RM164.14 riong, i nakapanahak koundaran kuminaa 210,918 susumikul,” ka disio.
Minoboros isio, ogumu’ inggisaman nokoindalan kaampai geran komulakan, pinsingilaan komilaan, suai ko’ ababayan ‘inovasi’ om kopongindopuan montok papatantu’ sukod wagu Sabah kiharo impohon montok mimang buru’.
“Noondo diti, kinapatahakan geran Ababayan Anak Muda soginumu’ RM300,000 nopo nga’ kointalangan tonggungan tokou monokodung pomusarahna om projik i kapanahak koundaran kumaa mogigiyon nokoiyonon. Gunoon poinsonong o geran diti montok popoindalan kaparagatan i koowit koundaran kumaa komulakan id kinoiyonon sompoopori,” ka disio.
Geran dilo’ maan poikido’ kumaa NGO komulakan id watas Lintuhun Undangan Pogun (DUN) Tanjung Aru, Petagas om Tanjung Keramat id Parlimen Putatan.
Ka di Hajiji, koburuon Sabah amu’ kalantoi nung sukod wagu amu’ onuan koiyonon, kosiwatan om sokodung ogirot montok mimburu’, ki’inovasi nogi’ momuruan.
Pinokianu nogi’ disio komulaakn do amu’ obingampawong di totondos om pongungudut i pinotonu’ do pembangkang id media sosial.
Id ababayan di miagal, i Hajiji suminasi’ nogi’ kinapatahakan ‘warta’ Tana’ Pamalabangan Taman Sempelang, Sembulan mantad di Potunud Koupisan Tana’ om Monukat, Datuk Bernard Liew kuminaa di Presiden MUIS, Datuk Yahya Hussin.
Nokopogulu, i Hajiji tinanud di Kumoduo Boyoon Montiri III po nogi’ Puru Parlimen Putatan, Datuk Ir. Shahelmey Yahya, om Puru Lintuhun Undangan Pogun Petagas, Datuk Awang Ahmad Sah Awang Sahari minooi intong koiyonon ponuridongan Walai Mesra SMJ montok di nohompitan kinotutudan id Kampung Petagas.
