Dr. Joachim (sogulu kotolu, gibang) luminoyou loyou pinotomod parti, “Bersatu Dalam PBS” miampai dilo lobi 300 puru PBS i nokotindapou id mitingan dilo’.
SANDAKAN: Ponowoli Presiden Parti Bersatu Sabah (PBS), Datuk Seri Dr. Joachim Gunsalam minokianu oinsanan puru PBS do tumilombus miuhup miampai koinsanai tambalut iso’ poburuon id koponoguangan Pomilian Agayo Pogun Ko-17 (PRN17) i pohoroon amu’ no alaid.
Suai dilo’, pinosorou disio puru ngaawi’ mooi do amu’ obintumbayaan kinapatayadan habar pinudali’ toi i mangaangahag i potonuon maya’ media massa.
“Aanu ku do poboroson somok tikid tadau haro nopo haal wagu i pobigodon do pembangkang montok mongurias pisompuruan pialatan PBS, Parti Solidariti Tanah Airku (STAR) om Parti Gagasan Rakyat Sabah (Gagasan Rakyat).
“Tikid-tikid tadau haro nopo i kalabus id media massa,” ka disio i po nogi’ Kumoduo Boyoon Montiri II.
“Mantad no dilo’ do kada’ mitilombus otumbayaan. Sukuon o lansanon akawas ilo’ nopo nga’ Luguan Bohogian sompoopori. Luguan Bohogian nopo, nung amu’ oilaan kopio, kada’ sinongkoboros-boros toi papalabus kointalangan di amu’ kohunung,” ka disio pinoposotol.
Minoboros isio dilo’ ontok pinopoimagon Mitingan Agayo Tounan Tolu Bohogian, ilo’ nopo nga’ PBS Bohogian Lamag, Sukau om Sekong id Lintuhun Mogigiyon Sandakan, di konihab.
Dr. Joachim nga’ minongunsikou nogi’ tonggungan di Ponorikohon Manganganjur miuhup, Luguan Bohogian PBS Lamag, Haji Ali Latif Taha mininggisom pinapaharo mitingan om nuhupan di Luguan Bohogian PBS Sukau, Haji Malaya Kasurah; Monunurat Bohogian PBS Sekong, Ahmad Awang nogi’ oinsanan AJK pinopoindalan i mininggisom pinapalantoi ababayan dilo’.
Karait di piuhupan pulitik, pinosotol di Dr. Joachim do Gabungan Rakyat Sabah (GRS) pointatap miuhup miamapi Pakahatan Harapan (PH) id koponoguangan PRN.
“Nung okon ko’ mantad sokodung Pakatan Harapan id kinaantalang ‘Langkah Kinabalu’ di 2023, kakal dati’ doti’ id bohogian pembangkang do noondo diti,” ka disio pinopointalang.
“Kohondot dilo’ pokionuon ku yati oinsanan sumambayang mooi do oinsanan pitorinaan osonong kapapanaho’ om i bobos osonong, montok papatantu’ GRS koponilombus kuasa’ pulitik agayo id Sabah,” ka disio kawagu.
Nokotindapou nogi’ i Luguan Bohogian PBS Sungai Sibuga, Kasirin Kamiran; Timbang Luguan Komulakan Longkod po nogi’ Timbang Luguan Komulakan PBS Elopura, Mohd. Rizuan Mohd. Damit; Exco Koonduan po nogi’ AJK PBS Elopura, Jennifer Lee i minongobi’ di Luguan Bohogian PBS Elopura, nogi’ tongo’ lansanon PBS di suai.
