KOTA KINABALU: Boyoon Montiri (KM), Datuk Seri Haji Hajiji Haji Noor (wanan) minamaramit kotombuluyan apantang Pesuruhjaya Akawas Singapura kumaa Malaysia, Vanu Gopala Menon id upis dau doid Menara Kinabalu, do hiti di tadau baino’.
Id pinirubaan dilo’, Hajiji minongunsikou di Vanu mantad tonggungan disio i toririmo monokodung inggisaman popointutun Sabah sabaagi rikoton kopoobuan agayo id ponong koiyonon diti.
“Koporintaan pogun mamagatang tonggungan Singapura id koponginggirotan piromutan miampai Sabah. Magalap yahai lobi kogumu’ kopoopuan mantad republik dilo’,” ka disio.
Daamot dilo’, i Vanu pinopoilo do Singapura poinsodia’ monokodung Sabah id mogisuai koyuon piuhupan suai kaampai id haal pintoriningan, piilangan kabaalon teknikal, siktor balajaran om susuai po.
Io Hajiji dii Vanu miniolon-olon nogi’ pomusarahan karait karalano’ monginggirot po do piromutan id pialatan goduduo bohogian.
Kinotombuluyan dilo’ notindapou nogi’ di pipiro upisor otuo koporintaan pogun om upisor Suruhanjaya Akawas Singapura doid Malaysia.
