Hajiji guminambar miampai tongo’ mamaramit sikulasip om susumikul id SICC di tadau baino’.
KOTA KINABALU: Sikulasip Koporintaan Pogun Sabah (BKNS) do noondo pinouyu nogi’ kumaa susumikul i tumanud pinsingilaan nayatan asasi, matrikulasi om A-level mimpuun toun diti, ka di Boyoon Montiri (KM), Datuk Seri Haji Hajiji Haji Noor.
“Suai dilo’, rontob elaun sikulasip montok koinsanai susumikul uhupan i masaan mongoput pinsingilaan id kotinanan pinsingilaan akawas koporintaan om swasta nga’ maan pogiadaso’.
“Inggisaman nopo diti nga’ wookon mantad tonggungan po’ompus BKNS montok monokodung koburuon balajaran id pogun diti montok papatantu’ lobi kogumu’ susumikul osonong naangayan kopongoput pinsingilaan kumaa nayatan lobi kasawat,” ka disio.
Minoboros id Ramai Kinapatahakan Gaa’ Sikulasip Cemerlang Sabah id Longkod Konvensyen Sompomogunan Sabah (SICC) do hiti di tadau baino’, ka di Hajiji, toun diti koporintaan pogun pinopoobi’ ginumu’ bobos akawas montok kapanahakan sikulasip nung piadangon di toun-toun nokopogulu dilo’.
“Mantad di RM50 riong nodi toun 2020, kinopoobian BKNS kotilombus mingkawas do tikid toun po’ompus limo toun nakatalib, nokosigampot RM136 riong diti toun 2025.
“Iti kopokito kinoingkawason soginumu’ RM86 riong nung piadangon di toun 2019, potilombus dino nokopokito tonggungan koporintaan pogun id koponokodungan balajaran tangaanak Sabah,” ka disio.
Minoboros isio, koporintaan pogun pinapaapu’ miampai poinggayo montok popoindalan mogisusuai inggisaman koburuon balajaran id pogun diti i nakapanahak koundaran kumaa kiginumu’13,550 susumikul mantad di toun 2021 gisom 2024.
Naamot dilo’, ka disio, tonggungan Tinimungan Yayasan Sabah nga’ nokointalang miampai kinopoobian kiginumu’ RM67.17 riong montok siktor balajaran toun nakatalib, i nakapanahak koundaran kumaa 3,234 susumikul.
Ilo’ nopo nga’ kinoingkawason agayo soginumu’ 148.96 pihatus nung piadangon di RM26.98 riong no di toun 2020, ka disio i minoboros do kiginumu’ 10,104 mamaramit nakaanu koundaranmantad Tabung Balajaran Pogun Sabah (TPNS) i pinoimpuun di wulan Koonom 2022, kopohompit ginumu’ pabalanjaan RM15.8 riong.
Minoboros isio, maya’ Bohogian Zakat om Fitrah Kounsol Ugama’ Islam Sabah (MUIS), lobi 48,000 susumikul id pototongkop Sabah nakaramit koundaran id suang timpu limo toun, miampai ginumu’ pabalanjaan RM92.4 riong.
Hajiji minoboros, inggisaman ngaawi’ diti kouhup mongingkawas naangayan balajaran tangaanak Sabah nogi’ monokodung koburuon ‘modal insan’ di osonong.
Pinosotol nogi’ disio do kopiongoi di inggisaman monginggirot om monginggumu’ inggisaman ponguhupan balajaran id pogun diti, mogisusuai koyuon ponguhupan pinoindalan maya’ Upis Monunurat Koporintaan Pogun (Karaja’ Ngaawi’ Pinotomod).
Toun diti nopo, ka disio, kiginumu’ RM77.5 riong pinoobi’ montok minambayar 14 inggisaman ponguhupan balajaran, wookon dilo’ Ponguhupan Tusin Porojistoran IPT (BUDI), Inggisaman Ponguhupan Komputer (BAIK), Ponguhupan Tikit Pontuludan Susumikul Sabah (GRS-SUBFLY), om SENTOSA – ponguhupan montok susumikul id kotinanan balajaran akawas nokoiyonon.
Inggisaman ngaawi’ balajaran diti nga’ sinokodung nogi’ do kotinanan miagal Yayasan Kotundunan Sabah om Perbadanan Baitulmal Sabah, ka disio.
Hajiji minoboros, mogisusuai koyuon ponguhupan balajaran i pinoindalan maya’mogisusuai koupisan om kotinanan kopokito tinonggungan ogirot koporintaan pogun id kapanamangan kotundunan om timpu dumontol tangaanak Sabah.
“Tumilombus tokou papatantu’ kasasanangan rayat toririmo ogompi’ om oonuan kopomodulianan poinpatut miampai amu’ monutun nantadon. Kumaa tongo’ komulakan, minsingilo no kopio om gusao’ no kalantaion.
“Sukabon kaganaan abaal miagal tumau, gas om ginoris, Balajaran om Pingludaan Teknikal om Vokasional (TVET) nogi’ Komilaan Winonsoi (AI) montok mongimbulai tulun kikomilaan akawas om osonong naangayan mantad Sabah id mogisuaian siktor,” ka disio.
Hajiji lumansan gaa’ diti kosili posunduran sunduan kumaa tongo’ susumikul do tumilombus abantug om id timpu di miagal kopomowongi’ ngaran Sabah id nayatan kabansaan om sompomogunan.
“Orohian oku nogi’ poposorou kumaa oinsanan mamaramit mooi do amu’ poposili gaa’ diti sabaagi padaahan montok kalawong. Nga’, silihon ilo’ sabaagi pongunsuban montok tumilombus minggisom mamagampot kalantaion id koponokodungan ababayan Sabah Maju Jaya om visi Madani pogun.
“Susumikul i nakaramit Gaa’ Sikulasip Cemerlang diti mongigit tonggungan di agayo montok timpu dumontol. Iti kaampai no sumili ombitanan di osonong kumaa tambalut sangampon, amu’ obingampawong di pomusarahan, pagkakaa adala’an toi haal i kopomiraag pogun om pomogunon tokou,” ka disio.
