Dr. Joachim (kotolu, gibang) pinopoindalan pinomutulan ribon id Tugu Kahandaman Pibatosan Pihunungan om Sopipantang id pialatan Mogigiyon Kampung Tarawas om Tongo’ Tutumanud Rungkap.
RANAU: Kumoduo Boyoon Montiri II po nogi’ Puru Lintuhun Undangan Pogun (ADUN) Kundasang, Datuk Seri Dr. Joachim Gunsalam ‘turun padang’ kopihondot Ababayan Lansanon Miampai Rayat om Pamaramaian Ramai Kinokotuan om pinopoimagon Tadau Kopoindalanan Adat Kerungkapan id Kampung Tarawas, do hiti di tadau Minggu’.
Ababayan duo tadau dilo’ kopohompit nogi’ do Kampung Tinaum om Kampung Mangkapoh.
Dr. Joachim (poindikau, tanga’) guminambar pongingitanan miampai mogigiyon Kampung Tarawas id Ramai Kapamaramaian Kokotuan om Tadau Kopoindalanan Adat Kerungkapan.
Dr. Joachim om oinsanan nokotindapou nonuan kopointalangan di Luguan Watas (OKK) Dominic Ghanie om pinopointalang do ‘rungkap’ nopo nga’ mantad komoi boros Dusun, i koowit rati ‘tulun labus i okon ko’ mantad kampung dilo’.
Ka di Dominic, tulun labus i ointutunan sabaagi ‘tulun rungkap’ pasagaon morobuat tana’ id kampung dilo’ montok pomutanaman, tumanud di kooturan om undang-undang kampung.
Dr. Joachim (koduo, wanan) tuminabi’ om monongkirumo miampai mogigiyon Kampung Tarawas ontok pinaharo ababayan miampai rayat DUN Kundasang.
Kohondot dilo’, Dr. Joachim minanangkabayahan nogi’ kumaa tongo’ tutumanud rungkap i binuruan di Aliyu Zinin.
Dr. Joachim pinapahabar do koponuridongan songinan lintuhun okoro’ montok kogunaan mogigiyon kampung om karaja’ ngaawi’ ponginsonongan ralan kampung Tarawas i maan poindalano’ id timpu oruhai diti.
Dr. Joachim (poindikau, tanga’) guminambar pongingitanan miampai mogigiyon Kampung Mangkapoh id kinopongohon ababayan i pinoindalan doid Lintuhun Okoro’ Kampung Mangkapoh.
Potilombus dino, ababayan dilo’ rinamai nogi’ miampai kinopoimaganan lintuhun okoro’ Kampung Mangkapoh om pamaramaian Ramai Kinokotuan.
Id boboroson disio, Dr. Joachim po nogi’ Montiri Koporintaan Koiyonon om Pomuwalaian minoboros, ababayan miagal dilo’ kopogirot pihunungan om koposuni pisompuruan id nayatan mogigiyon.
Dr. Joachim (kotolu, gibang) pinapatahak toluod ‘lampin’ bagang insan gunoo’ mantad di sawo di Dr. Joachim, Datin Seri Panglima Linda Ewit kumaa dilo songulun tina’ id Kampung Tinaum.
“Hiti tokou no do kopogititimung om kopogiboboros karait haal ngaawi’ kampung miampai otoronong,” ka disio.
Pinaharo nogi’ kopointalangan karait Ababayan PANTAS id Kampung Tinaum i pinolombus di Monunurat Olisok kumaa di Dr. Joachim, Japili Sami.
Dr. Joachim (tanga’, poindikau) guminambar pongingitanan miampai mogigiyon Kampung Tinaum.
Wookon i nokotindapou id ababayan dilo’ nopo nga’ ii Monunurat Pulitik kumaa di Dr. Joachim, Yubidi Gompoyo; Luguan Watas OKK Muhasip Haji Roman; Lansanon Koburuon Mogigiyon, Dounis Sani; tongo’ Luguan Tanak Mamasok Pogun, tongo’ Mongongobi’ Luguan Tanak Mamasok Pogun, molohingon kampung om Ponorikohon Puruankuasa’ Komogoton om Koumoligan Kampung (JKKK) nogi’ tongo’ sitaf UPPM DUN Kundasang.
