Dr. Joachim (tanga’) guminambar pongingitanan miampai tongo’ Luguan Bohogian om AJK PBS Zon 5 Sandakan id ramai dilo’.
SANDAKAN: Ponowoli Presiden Parti Bersatu Sabah (PBS), Datuk Seri Dr. Joachim Gunsalam pinapaharo pinirubaan miampai tongo’ Luguan Bohogian ngaawi’ om Puru Komitikuasa’ (AJK) PBS Zon 5 Sandakan kopohompit siam bohogian ilo’ nopo nga’ Tanjung Papat, Karamunting, Sekong, Elopura, Sungai Sibuga, Sungai Manila, Gum-Gum, Lamag om Sukau.
Pinirubaan i pinaharo id Citi Club Sandakan, do hiti di konihab nopo nga’ sabaagi inggisaman manahak pongunsuban, ponontudukan om kopointalangan karait di sondikoton parti id koponoguangan Pomilian Agayo Pogun (PRN) ko-17 i pikikiro koindalan id timpu oruhai.
“I bobos oponsol, nuru’ tokou potimporon id PBS,giroton parti om tumilombus papagaras kopoguraan karaja’, kaampai kopomoruhangan puru,” ka di Dr. Joachim pinoposotol id boboroson disio.
“Prinsip tokou do noondo nopo misokodung miampai Gabungan Rakyat Sabah (GRS), om monguhup tokou isai nopo calun di pinatantu’,” ka disio.
Dr. Joachim ontok minahaak boboroson disio.
Ka disio, pibarasan saalom GRS, masaan poindalan om kotumbayaan akawas pino’iliu kumaa kogoosan piomungan dilo’ do tumilombus momuruan koporintaan pogun id siriba’ buruanon di YAB Boyoon Montiri, Datuk Seri Panglima Haji Hajiji Haji Noor.
Nelson Sikin
Pinoposorou nogi’ isio di kukumaraja’ parti do sumosodia’ monoguang nunu-nunu kopikikiraan id PRN do obontol.
“Tilombuson tokou kopoburuan. Miampai poinhunung om poingulud, tantu’ tokou kaanu lumantoi pigusaan diti nung oinsanan tokou misompuru,” ka disio kawagu.
Id ramai di miagal, minongunsikou nogi’ isio kumaa Ponorikohon Manganganjur, Nelson Sikin i po nogi’ Kumoduo Luguan Bohogian PBS Tanjung Papat miampai AJK i nosili mananwalai kumaa ramai makan totuong dilo’ nogi’ popolombus ababayan i po nogi’ Monunurat PBS Bohogian Sekong, Ahmad Awang.
Dr. Joachim guminambar pongingitanan miampai AJK PBS i nokotindapou.
Daamot dilo’, i Nelson pinoposotol do koinsanai kopomuruanan PBS id Sandakan tumilombus mungkakat ogirot id tohuri di Presiden Parti om kopomuruanan di poinharo mantad.
“Toririmo dahai miampai parti, okon ko’ id timpu nopo do asanang, nga nogi’ ontok pointoguang kaantaban agayo dumontol PRN ko-17 diti. Monokodung poinponu’ yahai di prinsip PBS om GRS om miiso’ ginawo magada’ nunu nopo pangampawong toi pomusarahan i umbalan owiton do bohogian pembangkang,” ka disio.
Nokotindapou nogi’ id pinirubaan dilo’ i Timbang Presiden PBS, Datuk Dr. Christoper Mandut; Puru Kounsol Akawas i po nogi’ Luguan Bohogian PBS Sungai Sibuga, Kasirin Kamiran om Exco Koonduan PBS po nogi’ Luguan Bohogian PBS Sungai Manila, Sariah Madulin.
