Hajiji pinopoindalan ‘gimik’ kinopohimogonan Festival Koubasanan Rungus Sabah 2025.
KOTA MARUDU: Boyoon Montiri, Datuk Seri Haji Hajiji Haji Noor pinopoilo do koporintaan pogun monimbang atag montok popoinsawat rontob Watas Okoro’ Matunggong kumaa watas poinponu’, tumanud di ponorisidan kosudongan i poindalanon do bohogian kitonggungan.
“Koporintaan mokinongou angkab rayat Matunggong om monorisid di sunduk kogunoon nogi’ kosodia’on kogogonopan pogulu nunu-nunu kootusan pohimogonon,” ka disio ontok pinopoimagon Festival Koubasanan Rungus Sabah 2025 id Longkod Koubasanan Rungus Sabah, Jalan Teringai, do hiti di tadau baino’.
Nunsub nogi’ disio rayat do tumilombus manahak sokodung ouli’ kumaa koporintaan pogun buruanon Gabungan Rakyat Sabah (GRS) id Pomilian Agayo Pogun (PRN) do obontol.
“Ogumu’ inggisaman nowonsoi om masaan poindalanon do koporintaan GRS montok kasasanangan rayat om koburuon Sabah.
“Pasanganu tokou do palan koburuon Sondikoton Sabah Maju Jaya (SMJ) di atalang, i kapanahak koposuulan kumaa koburuon poinpuli om kopongobian konosipan rayat,” ka disio.
Minoboros isio, kaadangon pulitik om sokodung po’ompus mantad rayat oponsol kopio montok papatantu’ koinsanai katatapan, ababayan om inggisaman koporintaan aanu monilombus miampai aiso’ kopomohimpogongan montok komogoton pogun om kasasanangan oinsanan nayatan mogigiyon.
“Kada’ tokou sunsuri id dohuri. Tilombuno’ no miampai koporintaan GRS i nokopokito tonggungan om kogoosan mongobi’ rayat nogi’ popoburu’ pogun miampai poinpuli,” ka disio pinoposotol.
Hajiji minamarayou inggisaman Kotinanan Rungus Bersatu Sabah (PRBS) i tumilombus papaanjur Festival Koubasanan Rungus miampai pointatap sabaagi impohon kopointutunan koubasanan tinaru Rungus.
