Hajiji (tanga’) suminasi’ pinialanan dokumen pialatan di Awang Kadin (gibang) om i Mohd. Yaakob.
KOTA KINABALU: Boyoon Montiri, Datuk Seri Haji Hajiji Haji Noor minamaramit osonong piuhupan pialatan sabah Electricity Sdn. Bhd. (Sabah Electricity) om Unit Lansanon Koburuon Mogigiyon (UPPM) Pogun Sabah id inggisaman papatantu’ pangaba’ lotirik korikot id pototongkop pogun.
“Inggisaman diti koponginggonop inggisaman koporintaan pogun id kopotontuan rayat, kosuul no id koiyonon labus kakadayan om poonsokid, kaanu piormutan kumaa pangaba’ lotirik,” ka disio katalib suminasi’ ramai pinisoinan Memorandum Pihunungan (MoU) id pialatan Sabah Electricity om UPPM Sabah id Menara Kinabalu, do hiti di tadau baino’.
Ka di Boyoon Montiri, piuhupan diti nga’ kopiongoi nogi’ do tonggungan do Lansanon Koburuon Mogigiyon (PPM) id kapatahakan surupukaraja’ bobos osonong kumaa rayat id kinoiyonon sompoopori.
Hajiji (tanga’) suminasi’ ababayan suminain MoU id pialatan UPPM Sabah om Sabah Electricity.
Minoboros isio, PPM pasanganu tonggungan oponsol om kiguno popoindalan karaja’ diolo’ miampai poinponu’ kinotulidon om tonggungan.
Maya’ MoU solinaid sontoun diti, goduduo bohogian miuhup mongingkawas kooputon pangaba’ lotirik lolobi no kumaa koiyonon i amu’ po norikot, popoburu’ kogogonopan ginoris ogirot nogi’ mongingkawas kopurimanan tulun ginumuan karait surupukaraja’ om tonggungan Sabah Electricity, kaampai pomogunaan ginoris miampai opulokis.
Piuhupan diti nga’ pikikiro nogi’ kopongukab kosiwatan pakarajaan maya’ projik ngaawi’ i maan poindalano’.
Miampai oniba’, piuhupan kohunung pialatan Sabah Electricity om UPPM Sabah diti kosili longkod sukuon oponsol montok koinsanai haal kopohompit surupukaraja’ Sabah Electricity.
Suminain MoU id koobian Sabah Electricity nopo i Luguan Upisor Eksekutif, Datuk Ir. Ts. Mohd. Yaakob Jaafar, naamot Potunud UPPM Sabah, Datuk Awang Kadin Tang, minongobi’ kotinanan dilo’.
Nokotindapou ngoi’ Monunurat Koporintaan Pogun, Datuk Seri Sr. Safar Untong om Luyar Agayo Pogun, Datuk Brenndon Keith Soh.
