Dr. Joachim (poindikau, tanga’) guminambar pongingitanan miampai oinsanan Puru Kounsol Takawas PBS.
PENAMPANG: Parti Bersatu Sabah (PBS) tumilombus miampai Gabungan Rakyat Sabah (GRS) id Pomilian Agayo Pogun Sabah Ko-17 (PRN17) obontol diti, potilombus dino pinoposotol do kotiu’on parti dilo’ kumaa piomungan momorinta’ di poinharo mantad.
Ponowoli Presiden PBS, Datuk Seri Dr. Joachim Gunsalam minoboros, Puru Kounsol Takawas (AMT) PBS minomonsoi kootuson diti id mitingan dau i pinoindalan id longkod upis parti do hiti di konihab, i minogiboboros nogi’ di haal ngaawi’ oponsol om sondikoton parti.
“Ningkakaton dahai atalang. PBS tumilombus miuhup id piomugan GRS. Pointopot dahai di piuhupan pulitik diti dumontol PRN17,” ka disio id kointalangan katalib minonorikohon mitingan dilo’.
Dr. Joachim minoboros, parti dilo’ minomohulit nogi’ tonggungan montok monginggirot piromutan om piuhupan miampai komponen GRS ilo’ nopo nga’ Parti Solidariti Tahan Airku (StarSabah) i buruanon di Datuk Seri Dr. Jeffrey Kitingan.
“Otumbayaan yahai do pisompuruan pogialatan parti ngaawi’ nokoiyonon oponsol kopio id kopomojominan kaadangon pulitik om koburuon po’ompus montok Sabah. Piromutan dahai miampai StarSabah tilombuson monginggirot,” ka disio.
Minoboros isio, kogumuan AMT nga’ amu’ kaakun do miuhup miampai UMNO/Barisan Nasional (BN).
Mitingan dilo’ notindapou di Monontuduk Agayo PBS, Tan Sri Joseph Pairin Kitingan i pinapatahak pomusarahan kohondot sondikoton do parti.
“Tan Sri Pairin pinopoilang pomusarahan di osonong kopio id mitingan Biro Pulitik. Puralan disio karait ‘Sondikoton’ PBS kotilombus oponsol kumaa kopomuruanan parti,” ka di Dr. Joachim.
Minoboros isio, AMT nga’ minogiboboros nogi’ di rontob koundaon pomilian agayo om inggisaman nayatan siriba’ i masaan poindalanon montok monginggirot sokodung kumaa PBS dumontol PRN obontol.
Dr. Joachim nga’ pinoposotol nogi’ do PBS tumilombus mongingkanan popoburu’ koponsol rayat nokoiyonon, kopotutan ngaawi’ mamasok pogun om papatantu’ rolou Sabah kotilombus orongou id haal nasional maya’ ponginsomokan pulitik di osonong.
Pinokianu disio oinsanan puru parti do tumilombus misompuru om otiu’ kumaa poburuon parti, om sumodia’ poinponu’ monoguang pisahapan pomilian agayo miampai kotumbayaan.
