Hajiji guminambar miampai Puru Kounsol Ikonomi Obulou Sabah (MEBS) katalib minonorikohon Mitingan MEBS Bil. 1/2025 id Menara Kinabalu, Kota Kinabalu di tadau baino’.
KOTA KINABALU: Sabah nokoposurat iso’ po laang oponsol id abbaayan kopotundaan ogirot dau soira’ Kounsol Ikonomi Obulou Sabah (MBES) miampai pohimagon tinuridong sabaagi impohon koponguludan om kopoindalanan katatapan kosudong ikonomi obulou pogun.
Pinonuridongan MEBS pinolulus id Mitingan Nuludan Montiri Sabah Siri 10 Toun 2025, om mitingan kumoiso’ dilo’ pinaharo id Menara Kinabalu di tadau baino’, pinonorikohon di Boyoon Montiri, Datuk Seri Haji Hajiji Haji Noor.
Ka di Hajiji, MEBS tinuridong sabaagi inggisaman kosudong koporintaan pogun montok papatantu’ koburuon siktor ikonomi obulou Sabah koindalan miampai poingulud, osompuru om kiwaya’ akawas kopiongoi di angkab Sondikoton Sabah Maju Jaya (SMJ).
“Maya’ MEBS, kopongulud tokou tongo’ katatapan oponsol, popolulus do ababayan kiwaya’ akawas nogi’ miontong kopoindalanan ‘Kerangka Dasar’ om Strategi Ikonomi Obulou. Ilo’ nopo nga’ ponginsomokan pogiuhupan i kounsub kosunion ikonomi di ogirot, kopotonggoi toinsanan om kiginoris tumopong,” ka disio ontok minonorikohon mitingan dilo’.
Boyoon Montiri minoboros, MEBS nga’ koposiau koundolihon tiknologi om ‘inovasi’ id siktor maritim, kopiongoi di kogunoon koburuon ikonomi wagu i poposotol kogiroton om kapasarabakan tiknologi doun kaawagu.
Ka disio, ponuridongan MEBS nopo laang oponsol id kopoinggirotan piuhupan pialatan kotinanan koporintaan, akademia, pomorunan om mogigiyon id inggisaman poposili Sabah sabaagi momuruan agayo ikonomi obulou id ponongkoiyonon Asia Tenggara.
“Kopokito ilo’ tonggungan po’ompus koporintaan pogun montok poposimbuat kosiwatan rahat Sabah miampai poinbobos, popoinggayo kopoopuan om mamajamin kasasanangan rayat maya’ koburuon di ouli’ om asangal,” ka disio kawagu.
Hajiji minoboros, miampai laang diti, Sabah do babaino’ id solug di lobi kogirot id koponuridongan timpu dumontol di kapasanang mimpau komogoton rahat om ginoris ikonomi maritim.
Id mitingan kumoiso’ diti, Hajiji pinopoindalan nogi’ kinapatahakan watikah koposilihan kumaa walu’ MEBS i kapaampai do nuludan lansanon akawas pogun.
Yolo’ nopo nga’ kapaampai dii Kumoduo Boyoon Montiri po nogi’ Montiri Pomutanaman, Ponginsadaan om Pomorunan Akanon, Datuk Seri Dr. Jeffrey Kitingan; Kumoduo Boyoon Montiri III po nogi’ Montiri Karaja Agayo, Datuk Ir. Shahelmey Yahya; Montiri Kousinan, Datuk Seri Panglima Masidi Manjun; Montiri Ponombuluyan om Sandad Posorili’, Datuk Christina Liew; Montiri Koburuon Pomorunan om Kopongindopuan, Datuk Phoong Jin Zhe; Monunurat Koporintaan Pogun, Datuk Seri Safar Untong; Luyar Agayo Pogun, Datuk Brenndon Keith Soh; om i Potunud Unit Pamalanan Ikonomi Pogun Sabah, Datuk Jasmine Teo.
Suai dilo’, turu’ Ponorikohon Puruankuasa’ Teknikal nga’ nakaramit watikah kinoposilihan montok momuruan mogisusuai komponen teknikal MEBS, kaampai kaganaan pongonuan intodonon masi, pongindopuan rahat, kolidasan rahat, kopongimbulaian intodonon wagu, pamalanan marin, harata intelek om ponguludan baang.
Kinoposilihan diti kopohompit upisor otuo mantad komontirian om kotinanan teknikal oponsol pogun miagal Koupisan Tana’ om Monukat, Longkod Biodiversiti Sabah om Upis Asil Bumi.
Yolo’ momuruan kopoindalanan katatapan mantad sunduk teknikal om kopoindalanan, papatantu’ koinsanai inggisaman kapanau oturundus om poinpuli.
Sekretariat Sabah Maju Jaya (SSMJ) nopo sinili sabaagi ‘Urus Setia’ MEBS montok mongulud kopoindalanan kootusan kounsol miampai kiwaya’ om kohunung.
