Dr. Joachim (tanga’) minomiri’ soromin mato ontok minooi intong ababayan pomorisaan mato id SMK Bundu Tuhan.
RANAU: Mogigiyon id Kundasang nakaramit koundaran pomorisaan mato om soromin mato aiso’ kabayar maya’ ababayan mogigiyon onjuran Koisaan Golf Sabah (SGA) om sokodung do SPECTRA i binuruan di Dato’ Seri David Sew. Ababayan duo tadau dilo’ nokotimpuun di songkonihab om pinapanau id duo kinoiyonon sopisuai.
Kumoduo Boyoon Montiri II, Datuk Seri Dr. Joachim Gunsalam minoboros, inggisaman dilo’ nopo nga’ iso’ inggisaman osonong id koponguhupan do mogigiyon, kosuul no yolo’ i haro kobolingkahangan pongingintong.
“Ababayan miagal diti miampai mitilombus koponguhup monginsonong kopooposion mogigiyon nokoiyonon maya’ pongonjuran ababayan kotundunan. Ilo’ nopo nga’ kouhupan kawagu mogigiyon toi ‘go back to the community’,” ka disio ontok minooi intong do ababayan dilo’ id SMK Bundu Tuhan, di songkonihab.
Dr. Joachim (tanga’) guminambar miampai koinsanai i nokotindapou id pinomorisaan mato doid SMK Bundu Tuhan di songkonihab.
Mantad pinomorisaan mato dilo’, soginumu’ 123 susumikul mantad SMK Bundu Tuhan i pinorisa’ noilaan do momoguno soromin mato, om nonuan miampai aiso’ kabayar maya’ ababayan montok mogigiyon diti.
Naamot 300 mogigiyon nopo nakaramit koundaran di miagal ontok tadau koduo ababayan i nakapanau doid Sinasawat Poingukab Kundasang di konihab nokoposili ginumu’ koinsanai i nakaramit soromin mato aiso’ kabayar nopo nga’ 423 tulun.
Dr. Joachim (wanan) minintong pomorisaan mato i pinoindalan kumaa dilo songulun tulun nolohing ontok minooi intong pinomorisaan mato id Sinasawat Poingukab Kundasang di konihab.
Dr. Joachim, i po nogi’ Montiri Koporintaan Koiyonon om Pomuwalaian nogi’ ADUN Kundasang, minonongkounsikou nogi’ kumaa SGA mantad inggisaman pinapaanjur ababayan kotundunan dilo’.
Minonongkounsikou nogi’ isio kumaa di Molohingon Sikul SMK Bundu Tuhan, Prince Abd Halim Chan, nogi’ bohogian mononorina’ sikul mantad sokodung om kouhupan di pinatahak.
Dr. Joachim (id tohuri) guminambar miampai tongo’ mogigiyon kampung i mindad gontok momonsoi pomorisaan mato di konihab.
Koponongkounsikahan di miagal nogi’ kumaa mononoluod Sinaland Sdn. Bhd. Om Primaland Sdn. Bhd. nogi’ mokianu do lobi kogumu’kotonudan mantad kotinanan okon koporintaan (NGO), komponi mimpoopori om tongo’ koisaan do papaanjur ababayan i kapanahak koundaran kumaa mogigiyon labus kakadayan.
Dr. Joachim (tanga’) monongkirumo dilo’ songulun tulun nolohing i maso mamakai soromin mato katalib minindalan pinomorisaan mato i pinapanau duo tadau dilo’. Dr. Joachim nga’ minintong nogi’ do koyuon mato songulun kusai nokotindapou minindalan pomorisaan mato, id Sinasawat Poingukab Kundasang di konihab.
Naamot dilo’, Monunurat SGA po nogi’ Potunud Projik, Ian Yong minoboros, ababayan ponimpuun nopo diti nga’ wookon di inggisaman bohogian disio monguhup tinimungan di momoguno, lolobi no tongo’ susumikul.
“Piuhupan miampai SPECTRA nakapasaga’ dahai pinopoindalan pomorisaan mato miampai poinpuli nogi’ pinopoikid soromin mato aiso’ kabayar kumaa susumikul om mogigiyon nokoiyonon i noilaan do kosudong.
“Kalansanan dahai yolo’ i nokopoindalan pinomorisaan diti kaanu pongingintong di lobi kosonong, potilombus dino kopoingkawas pinsingilaan om koposion tadau-adau diolo’,” ka disio.
