Hajiji guminambar pongingitanan miampai pakakaraja’ Sabah id Kibing
KOTA KINABALU: Boyoon Montiri, Datuk Seri Haji Hajiji Haji Noor minamarayou tinonggungan Tinimungan Kibing id koposodiaan kosiwatan pakarajaan kumaa 700 po tanak Sabah maya’ kopongonuan pakakaraja’ wagu i kotimpuun wulan Kolimo diti.
Minoboros isio, kopongonuan wagu dilo’ kopomoruhang kumaa soginumu’ 1,625 tanak Sabah i nakakaraja’ id mogisusuai karaja’ koponguludan, kejuruteraan, teknikal om (operasi) kopoindalanan id Tinimungan Kibing.
“Iti mongobi’ lobi 83 pihatus mantad koinsanai ginoris karaja’ Tinimungan Kibing. Iso’ kinomogoton di osonong kopio tu’ okon nopo ko’ kapagaras mogigiyon nokoiyonon tokou, nga nogi’ koposuni sunduan koburuon oinsanan. Bayahan om pounsikou,” ka disio ontok tuminindapou ramai kapamaramaian Aidilfitri miampai pakakaraja’ Kibing id kilang dau doid Taman Pomorunan Kota Kinabalu (KKIP) do hiti, di baino’.
Nokopogulu, Boyoon Montiri pinoilo do Tinimungan Kibing popotimpuun kopogonuan pakakaraja’ dilo’ miampai kouhupan Sekretariat SMJ mimpuun ko 13 gisom 23tw Kolimo id upis watas Ranau, Tuaran, Beaufort, Papar, Kota Kinabalu om Penampang.
Hajiji ruminuba’ dilo tongo’ pakakaraja’ Sabah id Kibing.
“Orohian oku nogi’ poposotolon koponsolon montok poposuul kopogonuan pakakaraja’ id nayatan tangaanak Sabah om mongunsub oinsanan popoburu’ pomorunan do okon nopo ko’ mamagaji ginoris karaja’ nokoiyonon, nga nogi’ papaapu’ id pingludaan om koburuon diolo’.
“Inggisaman ‘kolektif’ diti oponsol montok papatantu’ ginoris karaja’ nokoiyonon tokou pasanganu komilaan om toilaan di gunoon montok monumboyo’ kopomogunaan pomorunan,” ka disio.
I Hajiji minoboros, timpu oponsol nosupu’ soira’ Tinimungan Kibing minonimpuun ponuridongan kilang pamansaian ‘kaca solar’ kitiknolgoi akawas kigatang RM2.5 bilion id Sabah di toun 2022.
“Kinorikatan Tinimungan Kibing babaino’ diti okon nopo ko’ inggisaman ‘transformasi’ (kosimbanon) montok Sabah, nga kopokito kinalantaion koporintaan pogun id kinopomogusaan projik ngaawi’ kiwaya’ akawas montok no do komogoton om kosunion ikonomi pogun,” ka disio.
Hajiji pinopoilo nogi’ do Tinimungan Kibing kotilombus koposurat kinomogoton soira’ di wulan Kohopod om Iso’ toun nakatalib, tinimungan diti pinapaapu’ id iso’ po projik montok monuridong kilang pamansaian kaca solar di wagu kigatang RM7.2 bilion id Kimanis.
“Gisom baino’ diti, waya’ osonong mantad kinorikotan Tinimungan Kibing id Sabah nokito nodii om kounsub kopio, miampai gatang kuntirik lobi R50 riong i nakatahak kuminaa tongo’ komponi nokoiyonon pointonod nokotimpuun kinapamansaian.
“Poinggigit tokou kotumbayaan akawas do Tinimungan Kibing kotilombus koinggayo om kapapanau tonggungan oponsol id kouhupan kumaa komogoton timpu anaru Sabah,” ka disio.
Id timpu kopointalangan dilo’, Hajiji pinoilo nogi’ do nuludan kumoiso’ Kibing noondo poinpanau poinponu’ om nokopoudar 1,500 kontena tikid wulan miampai gatang kosigampot USD14 riong.
Nuludan koduo Kibing pikikiro kosigampot ‘kapasiti’ (ginumu’) kopolobusan poinponu’ do wulan Koonom diti, naamot nuludan kotolu pikikiro koindalan poinponu’ dumontol koompokon toun diti.
Rikoton poudaran Kibing kopuli do Asia Tenggara, Asia Selatan, Amerika Utara, Afrika om Eropah.
“Orohian oku poposotol tonggungan koporintaan montok popoinsanang kosuangon mangangapu’ kumaa Sabah. Kiangkab tokou papaharo koyuyuon di kopongimbayat lobi kogumu’ mangangapu’.
“Kopoopuan diti okon nopo ko’ kopohimpit koponsupuan kosiwatan pakarajaan, nga nogi’ posunduran ‘inovasi’ om koponginsonongan sinonong koposion rayat,” ka disio.
Nokotindapou nogi’, Montiri Pidagangan Suang Pogun om Kos Sara Hidup, Datuk Armizan Mohd. Ali; Montiri Koburuon Pomorunan om Mongindapu’ Sabah, Datuk Phoong Jin Zhe; nogi’ Monunurat Koporintaan Pogun, Datuk Seri Sr. Safar Untong.
