Hajiji miampai puru ngaawi’ MTMD katalib mitingan.
KOTA KINABALU: Inggisaman pogiuhupan nuru’ onuon montok mongingkuri’ ginumu’ panagih om moomoguno “barang” pogoduhan id Sabah miampai manalob kopokionuan om pangaba’ dadah, ka di Boyoon Montiri (KM) Datuk Seri Haji Hajiji Haji Noor.
Minoboros isio, Sabah nokoposurat kinoingkawason soginumu’ 7.5 pihatus id nayatan panagih om moomoguno barang pogoduhan, ilo’ nopo nga’ soginumu’ 9,207 tulun noilaan di toun nakatalib nung piadangon di 8,567 di toun 2023, nga’ ginumu’ diti kopongobi’ nodi 4.8 pihatus mantad pinongintoban kabansaan.
“Sabah nokoposurat rontob 246 panagih, kopitanud di sondikoton nasional ilo’ nopo nga’ amu’ katalib 400 panagih om moomoguno sala’ dadah montok tikid 100,000 mogigiyon.
“Ginumu’ diti kopokito kinoingkawason id pototongkop pomogunon om somok koinsanai pogun. Koyuon koingkawason diti kopotongob no kopio om nosili iso’ kaantaban kumaa dati’ koinsanai. Kiguno tokou popoinlipat inggisaman montok monoibau kobolingkahangan diti, kosuul no id kapantalaban pangaba’ om kopokionuan dadah id pogun diti,” ka disio.
Minonorikohon Mitingan Kounsol ‘Tindakan Membanteras Dadah’ (MTMD) Pogun id Menara Kinabalu di tadau baino’, minoboros i Hajiji, montok toun diti tingkananon nopo nga’ mononduli’ duo koiyonon kikobolingkahangan akawas, ilo’ nopo nga’ Penampang om Balung, Tawau.
“Montok patantu’ kalantaion poposili Penampang om Balung sabaagi watas otomou, Presiden Kounsol Kakadayan Penampang om Kounsol Kakadayan Tadau sabaagi ponorikohon MTMD watas sopipoopori sinili sabaagi mongungulud koiyonon kikobolingkahangan akawas id watas diolo’,” ka disio kawagu.
Minoboros isio, inggisaman nga’ tilombuson nogi’ montok monimporon ko’oitan “otomou” montok turu’ koiyonon kikobolingkahangan akawas ilo’ nopo Likas, Inanam, Luagan, Patikang om Tuarid Taud, Tanjung Batu nogi’ Merotai.
Id mitingan dilo’, duo karatas karaja’ pinawalad kaampai ababayan ponimpuun “Kampung Sejahtera Tanggungjawab Bersama” di Kotinanan Antidadah Kebangsaan (AADK) Sabah.
“Pokionuon ku oinsanan puru mitingna do mongilo om manahak simbar di inggisaman monoibau kobolingkahangan dadah id Sabah montok monigampot sondikoton ‘Dadah Terkawal 2025’,” ka disio.
Minoboros isio, dadah kakal po sangod koiso’ pomogunon, mantad dilo’ oinsanan puru kounsol kiguno mogiuhup do momunso kopogundoronokan diti montok timpu dumontol sakag wagu pogun.
Nokotindapou nogi’ i Montiri Koburuon Mogigiyon om Kasasanangan Rayat, Datuk James Ratib; Monunurat Koporintaan Pogun, Datuk Seri Sr. Safar Untong; Luguan Pulis Sabah, Datuk Jauteh Dikun om Potunud AADK Sabah di wagu, Elmariah Chung.
