KOTA KINABALU: Ponorikohon Puruankukasa’ Induk Pamaramaian Ramai Kaamatan Nayatan Pogun Sabah Toun 2025, Datuk Seri Dr. Jeffrey Kitingan pinapahabar do uhu pinotomod montok pamaramaian Ramai Kaamatan toun diti.
Minoboros isio, uhu di pinili’ nopo nga’ “kaamatan Montok Toinsanan” i pinadalin nogi’ id Boros Inggilis “Kaamatan For All” (Kaamatan Untuk Semua – Boros Melayu).
Uhu diti kosili impohon om sukuon oponsol montok oinsanan koyuon koposolimbahan om kopointutunan po’ompus poindalan pamaramaian, kaampai id media massa, media poinsurat, nogi’ id media sosial, ka disio i po nogi’ Kumoduo Boyoon Montiri II po nogi’ Montiri Pomutanaman, Ponginsadaan om Pomorunan Akanon Sabah (MAFFI) id kointalangan di tadau baino’.
Pinokianu nogi’ disio oinsanan bohogian, lolobi no manganganjur, kotinanan koporintaan, kotinanan okon koporintaan (NGO) om moomoguno media do papatantu pomogunaan uhu diti miampai ouli’ id oinsanan kopointutunan om piromutan pinotomod kopohompit Ramai Kaamatan 2025.4.4
Ramai Kaamatan nopo nga’ karamaian tikid toun mogigiyon Kadazan, Dusun, Murut om Rungus (KDMR) id Sabah i ramaion do wulan Kolimo tikid toun montok mamaramai timpu kinoomotan om poposuni pisompuruan.
