Dr. Joachim (kosiam, gibang), Marysa (tanga’) nogi’ puru PBS i nokotindapou pinapalahat “Bersatu!” id ababayan dilo’.
KOTA KINABALU: Parti Bersatu Sabah (PBS) pinoposotol ningkakaton dau montok tumilombus popoburu’ tongo’ kopotutan rayat Sabah, kopiongoi di tonggungan dau sabaagi parti pulitik bobos otuo id pogund iti pointonod 40 toun nakatalib.
Ponowoli Presiden PBS, Datuk Seri Dr. Joachim Gunsalam minoboros, parti dilo’ potilombus ogirot id kopomususan kopotutan kosuulon rayat Sabah om tumopot kumaa prinsip pulitik orukut tinaru.
Minoboros isio dilo’ ontok pinopohimagon pinonuridongan Bohogian PBS Darau id iso’ ababayan doid Zenia Steamboat and Grill, Sepanggar, di songkosodop. Ramai dilo’ notindapou kiikiro 300 tulun, kaampai lansanon bobos akawas om puru ngaawi’ PBS.
Dr. Joachim (koduo, gibang) minamaramit tandamato mantad di Marsya sinasi’ dilo’ tongo’ Puru Kounsol Akawas PBS.
Ka di Dr. Joachim, suai ko’ popoburu’ kopotutan rayat, PBS nga’ kiangkab nogi’ papatantu’ koburuon pogun om kasasanangan rayat Sabah korompok di tongo’ pogun ngaawi suai id Semenanjung.
“Mimang tokou do kogogonopan kopio miagal pangaba’ waig, lotirik, talun-alun, balajaran om surupukaraja’ kolidasan di korompok doid Semenanjung,” ka disio.
Nangatan nogi’ disio puru PBS Darau do momuhondom kawagu Sunduan85 i nosili nimpuunon kopoburuan parti pointonod pinonuridongan dilo’.
Daamot dilo’, minanangkabayahan i Dr. Joachim kuminaa di Dato’ Seri Marsya @ Norhaizah Abu Bakar mantad kinalantaion disio minanampasi kawagu PBS Darau om lumansan bohogian dilo’ kotilombus ogirot nogi’ manahak tonggungan poinponu’ kumaa parti.
Nokotindapou nogi’ id ramai dilo’ i Timbang Presiden PBS, Datuk Johnny Mositun i po nogi’ Ponorikohon Pointatap Mitingan, Luguan Tinimungan Komulakan (KPP), Dr. Christoper Mandut, Monunurat Eksekutif PBS Mesilus Roman, nogi’ puru ngaawi’ Kounsol Akawas (AMT).
