Jainisah (kaapat, gibang) ruminamit tandamato pinotunui di Victor.
KOTA KINABALU: Kapanamangan koumoligan id Zon Oumolig Sabah Kosilahon (ESSZone) nokoinggirot.
Komander Eastern Sabah Security Command (ESSCom), Datuk Victor B Sanjos minoboros kes pananggayan di tohuri naantakan id ESSZone nopo nga’ di ko 15tw Koiso’ 2020 ilo’ nopo nga’ limo toun di nakatalib.
“Iti nosusuhut di laang ngaawi’ om kinopoinggirotan id kinoiyonon ngaawi’ di lobi pointamong om lobi koumolig.
“Suai dilo’, ilo’ po nogi’ nga’ mantad kouhupan mogigiyon om tongo’ kotinanan di suai.
“Mantad no dilo’ do pungaran koumoligan id koiyonon Tisan Kosilahon, nokopokito ilo’ kinoingkawason om kinoruhangon kinorikotan tutumombului labus om nogi’ suang pogun kumaa koiyonon diti.
“Nakaanu oku nogi’ kopoilaan lobi kogumu’ kopoopuan mantad labus pogun om nogi’ suang pogun i rumubpu’ id watas Tisan Kosilahon Sabah.
“Sabaagi palan timpu dumontol, ESSCom kiatag do momoguno tiknologi id sunduk kapanamangan piwolitan miagal tiknologi AI om nogi’ koponuridongan pos ngaawi’ di wagu mooi do koumoligan lobi koinggirot,” ka disio soira’ rinubaan media katalib kotombuluyan apantang kumaa di Potunud Kopointalangan Sabah (JaPen), Jainisah Mohd Noor id Kompleks Bersepadu Komontirian Komunikasi do hiti di tadau Kotolu.
Ka id Victor, kinotombuluyan dilo’ kituduan do monsupu’ piuhupan pisokodungan om momonsoi pamalanan montok koponsolon ngoduo lolobi no id sunduk koponsolon kosudong.
“Bohogian ESSCom momoguno kopio kouhupan om surupukaraja’ mantad kabaalon JaPen Pogun Sabah i tantu’ no do okito kaanu popointalang koyuon otopot, kongoi-ongoyon otopot, kongo-ongoyon koumoligan id pogun Sabah lolobi kopio id watas ESSZone maya’ tongo’ kaparagatan i poinsalanon do JaPen,” ka disio kawagu.
Daamot dilo’, Luguan Upisor Eksekutif ESSCom, Datuk Dr. Jamaluddin Mohd. Ali pinopoilo suai ko’ karaja’ koumoligan, ESSCom nga’ moningkanan nogi’ pipiro ababayan agayo suai wookon dilo’ piuhupan miampai koupisan om kotinanan nogi’ kaparagatan miampai mogigiyon.
“ESSCom monilombus pipiro kaparagatan mogigiyon i pinoindalan di toun nakatalib om nogi’ pipiro ababayan wagu wookon dilo’ Kampung Angkat Madani hinombo do Kampung Inderahsabah id DUN Apas pinili’ montok ababayan diti,” ka disio.
Nokotindapou nogi’, Kumoduo Komander ESSCom Brigadier Jeneral Mohd Ismail Kamarudin, Potunud Bohogian Kotorinaan Keurusetiaan ESSCom Imelda Godon, Luguan Monguhup Potunud (KKP) Bohogian Surupukaraja’ Piromutan om Koburuon Mogigiyon JaPen Sabah, Peter Tong; KPP Bohogian Media Siber, Geraldine Voo om KKP Unit Keurusetiaan, Siti Mariam Aziz Rashid.
