Hajiji minonorikohon mitingan id Menara Kinabalu, konihab.
KOTA KINABALU: Boyoon Montiri (KM), Datuk Seri Haji Hajiji Haji Noor mokianu oinsanan pakakaraja’ koporintaan i nonuan tonggungan mooi do maganu kopomodulianan kohondot di haal ngaawi’ i kopongumpadan kasasanangan mogigiyon.
“Manu oku dokoyu oinsanan kipogoyuon ‘proaktif’ om opusou di kogugunoon mogigiyon,” ka disio id iso’ mitingan miampai Monunurat Pointatap, Momuruan Koupisan, Upisor Watas om Momuruan Bohogian Kikuasa’ Nokoiyonon id Menara Kinabalu, do hiti, konihab.
Boyoon Montiri minoboros, oinsanan projik di nokolulus montok koundaran mogigiyon mositi’ no do poindalanon osisikap.
Pionsotol disio do koulalaho’ birokrasi kiguno ingkurian miampai popoinsanang kopoindalanan karaja’, lolobi no id kapanalasaian haal ngaawi’ kopohompit infrastruktur om kogogonopan sandad miagal pangaba’ waig om lotirik.
Id haal sopisuai, minoboros i Hajiji, koporintaan pogun nokopoindalan karalanon koburuon montok kasasanangan mogigiyon om nakaanu pinopoingkawas asil pogun kuminaa RM7 bilion toun nakatalib maya’ inggisaman id siriba’ Palan Koburuon Sondikoton Sabah Maju Jaya (SMJ).
Minoboros isio, laang osau kopoopuan nokopongimbayat lobi kogumu’ kopoopuan kuminaa id Sabah, om kointalangan kinalantaion diti okito soira’ Taman Tumau om Gas Sipitang (SOGIP) do noondo noiyon-iyon poinponu’, naamot Koiyonon Pomorunan Kota Kinabalu (KKIP) oruhai kosigampot ginumu’ poinponu’.
Suai dilo’, minoboros isio, Pibatosan Piuhupan Komersial (CCA) miampai Petronas nakapanahak koundaran kumaa Sabah id pomorunan tumau om gas, suai ko’ koprointaan pogun masaan miboros montok maganu bohogian om koundaran di lobi kagayo montok Sabah.
“Iti nopo naangayan i amu’ po insan kosigampot pogulu diti, om waya’ diti kiguno tilombuson miampai sokodung nogi’ inggisaman oinsanan bohogian,” ka disio.
Boyoon Montiri nga’ pinopoilo nogi’ do Nuludan Montiri Pogun pinopolulus kopogonuan lobi kogumu’ ginoris abaal, kosuul no injinior i gunoon id Koupisan Karaja’ Agayo om Koupisan Waig.
Minoboros isio, kapapanahan ponuangan karaja’ id goduduo koupisan mamaso poindalan montok papatantu’ kinosonongon kopoindalanan karaja’.
“Miampai kopongonuan pakakaraja’ diti, kalansanan kobolingkahangan miagal haal kapangabaan waig, o wookon, aanu manalasai,” ka disio.
Hajiji nga’ minokianu nogi’ ruputan ogonop om osikap mantad Koupisan Waig karait kobolingkahangan pangabaan waig id Sandakan, tu’ iso’ po mantad di tolu loji pongubatan waig di poindalan.
“Bohogian konsesi mositi’ popoindalan tonggungan diolo’ tumanud kuntirik do mangaba’ waig kumaa tongo’ momoguno id watas dilo’ toi potoguang do pongontok,” ka disio.
Kapt:
