Dr. Joachim pinopowonsoi pinomutulan ribon miampai di Montiri Kaunselor om Luguan Misi, Konsulat Republik Korea, Yoon Ockchae.
PENAMPANG: Komontirian Koporintaan Koiyonon om Pomuwalaian (KKTP) noondo masaan mogintong kawagu koinsanai undang-undang okoro’ om ordinan di poinhompit, kaampai i kopohondot do koponguludan sampal.
Kumoduo Boyoon Montiri II po nogi’ Montiri KKTP, Datuk Seri Dr. Joachim Gunsalam pinopointalang do inggisaman diti nopo nga’ somboogian mantad inggisaman po’omus montok poposili Sabah lobi oburisi’ om posindak rontob koposion mogigiyon dau.
Minoboros isio dilo’ ontok pinopoimpuun “Bio Geran Machine” id linimput Sabah Credit Corporation (SCC) id Donggongon do hiti, di konihab.
Bio Green Machine winonsoi montok mompurusis ogumu’ sampal organik toi sampal taakanon, mongolon dilo’ kumaa asil suai i kigatang miagal do baja.
Dr. Joachim minoboros, koporintaan pogun, maya’ KKTP, monokodung poinponu’ panalasaian ‘inovatif’ miagal diti tu’ okon nopo ko’ kouhup kumaa pososorili’ di lobi oburisi’ id Sabah, nga nogi’ kiharo koundaran ikonomi.
Misin diti winonsoi do nokoiyonon, monokodung ikonomi pogun.
Minongunsub nogi’ isio mongungusaha’ premis taakanon om papalabus takanon do mamaramit guno tiknologi diti tu’ kouhup ilo’ manalasai kobolingkahangan diolo’ om id timpu di miagal koposili Sabah sabaagi koiyonon di lobi oburisi’ om osimbayan montok iyon-iyonon.
Ababayan dilo’ nokopokito po nogi’ pinisoinan Memorandum Pihunungan (MoU) id pialatan Redwin Technologies Sdn. Bhd. (RTSB), mangangab’ tisoiso’ no produk diti, Sabah Credit Corporation (SCC) sabaagi mananahak kousinan, om Eco Greenpia Sdn. Bhd., papalabus Bio Green Machine.
Nokotindapou nogi’ Ponorikohon SCC, Datuk Seri Dr. Yee Moh Chai; Luguan Upisor Eksekutif (CEO), Datuk Taitim Tulas; Ponorikohon Eksekutif RTSB, Dr. Edwin Richard Sumpong; om CEO Eco Greenpia Sdn. Bhd., Yoon Chan Soo.
