Dr. Joachim (tanga’), Lo (koonom, gibang), oinsanan komulakan om tombului naalap guminambar pongingitanan.
TAWAU: ‘The Spirit of 1985’ (sunduan kopoburuan 1985) nosili posunduran kumaa ‘Jelajah Konvoi Tinimungan Komulakan Parti Bersatu Sabah (PBS)’ i pinoimpuun di tadau Minggu’ katatalib.
Ponowoli Presiden, Datuk Seri Dr. Joachim Gunsalam minonuhu’ Tinimungan Komulakan PBS do momuginawo sunduan kinopoburuan 1985 i pinoburu’ di tongo’ lansanon PBS nokopogulu om popointalag dilo’ kumaa oinsanan sukod wagu.
Ka disio, poburuon do PBS nopo nga’ montok no do mongumolig om monugat kopotutan ngaawi’ mogigiyon Sabah i poinsuang id Pibatosan Malaysia 1963 (MA63).
“Kohondot dilo’, ogumu’ pokionuon di nosugat montok koponsolon mogigiyon Sabah. PBS kakal monugat oinsanan i apatut do sugaton,” ka di Kumoduo Boyoon Montiri II dilo’ ontok pinopoimagon pinomupusan Jelajah Konvoi dilo’ id Kubota Square, do hiti di songkosodop.
“PBS sabaagi parti nokoiyonon bobos otuo id Sabah nopo nga’ songinan parti mogisuai tinaru, mogisuai ugama’ tumilombus monugat nunu i apatut sugaton montok koponsolon mogigiyon Sabah miagal do id siktor balajaran, kolidasan, koburuon om susuai po,” ka disio.
Dr. Joachim (kotolu, gibang) ruminamit tandamato mantad di Sahrol.
Dr. Joachim minokianu nogi’ do Tinimungan Komulakan papagaras PBS om monginggumu’ po do kaparagatan miagal Jelajah Konvoi diti kumaa pototongkop Sabah.
“Mimang tokou oinsanan popointalang lobi kogumu’ karait do sunduan kinopoburuan PBS.
“Miampai papaharo jelajah diti do kopoinggirot tokou nogi’ piombolutan om lobi kopoinggirot po do piromutan silaturahim sompipi’ komulakan PBS.
“Iti (jelajah konvoi) nopo nga’ impuunon montok miilang om misompuru mongingkawas sinonong kohompitan id PBS kosuul no kumaa tongo’ sukod wagu id pototongkod Sabah.”
Hinulit po nogi’ disio do PBS pointatap miampai do GRS.
“Kumaraja’ tokou agaras miampai tongo’ tambalut id GRS montok lumantoi Pomilian Agayo Pogun (PRN) di obontol.
“Kohondot dilo’, monilombus tokou nogi’ do pisokodungan pialatan koporintaan pogun om koporintaan Pisompuruan,” ka disio.
Dr. Joachim (tanga’) guminambar pongingitanan miampai di Dr. Christoper (kolimo, wanan) om Exco Komulakan sabaagi urusetia i nakaampai pinopoindalan ababayan Jelajah Konvoi Tinimungan Komulakan PBS.
Daamot dilo’, Puru Parimen Tawau, Datuk Lo Su Fui i po nogi’ Puru Kounsol Akawas (AMT) PBS minonongkounsikou kuminaa di Dr. Joachim mantad kinorikotan om minokianu oinsanan Komulakan PBS Tawau i nokotindapou do tumilombus mimburu’ doid parti.
Nokunan disio do piromutan osonong id pialatan PBS om tongo’ tambalut id GRS nosili haal kinalantaion PBS id Parlimen diti.
Ka disio, id nayatan Parlimen, koburuon id Tawau nopo nga’ aadang om amu’ mintong tinonudan pulitik id toisoiso’ kinoiyonon.
Nokotindapou nogi Luguan Tinimungan Komulakan PBS, Dr. Christoper Mandut; AMT PBS, Goon Thien Shang; Luguan Bohogian PBS N.73 Sebatik, Sahrol Mahoolop om pipiro luguan bohogian PBS om Exco Komulakan.
